Семёновкысо школ интернатлан – 90 ий. Тиде жапыште ты туныктымо тӧнеж тӱжем утла выпускникым туныктен луктын. Кызыт тыште начарын колшо да ужшо 107 йоча шинчымашым налеш. Школышто икмыняр тӱрлӧ класс-влак улыт: соҥгыралан, начарын колшылан, удан кутыршылан да кохлеарный имплантаций деч вара йоча-влаклан келыштарыме. Школ деч ончычсо группыш икшывым 2 ият пелаш гыч налыт. Тӱҥалтыш звенош – 6 ият пелаш йочам погат. Классыште парт-влакым пелоҥго ден шындат. Тыге кажне тунемше урокышто пошкудыжым да туныктышым ужеш. Тӱҥ шинчымашым пуышо предмет-влак деч посна расписанийыште тыгак специальный предмет-влакат улыт. Мутлан, социал да быт ориентирований уроклаште соҥгыра йоча-влакым тӱшкан пайдаланыме верлаште, йолташ дене шкем чын кучаш туныктат. Семёновкысо школышто тыгак ятыр кружок пашам ышта. Тунемше-влак куэм да бисер дене пашам ыштат, тӱрлат, парикмахер да визажист пашалан тунемыт, пу гыч пучкедат. Кутырмым вияҥдымаш йочан колмо анализаторжо деч шога. Садлан тудым тональный да речевой аудиометрий полшымо дене тергат. Интернатыште 100 еҥлан келыштарыме малме корпус верланен. Йоча-влакым кечыште 5 гана пукшат. Школ-интернатым тичмашнек кугыжаныш куча. Педагог-влакын тыршымыштлан кӧра йоча-влак тӱрлӧ олимпиадылаште, профессионал мастарлыкым шуарыше конкурслаште вийыштым тергат. Семёновкысо школ интернат 90 ияш лӱмгечылан полеклалтше ятыр пайремым эртара. Тыгак, палемдыман, школын шке эмблемыжым ямдыленыт.
Комментариев: 0