Марий Элыште кугу опытан журналист-влак дене иктӧр печать кечын йоча-влакым саламленыт. «Кипяток» йоча газет тӱвыра министерстве да «Марийская правда» газет редакций дене пырля Марий Эл Республикын 100 ияш лӱмгечыжлан пӧлеклалтше конкурсым иктешлен. Тудо «Мый Марий Элыште илем да тидын дене кугешнем» маналтеш. Жюрин еҥже-влак критерийлан келшыше 22 паша гыч куд сеҥышым ойыреныт. Йоча-влак сочиненийым возеныт, видеоролик-шамычым ямдыленыт. Эн сай пашам ойыраш моткоч неле лийын. Тунемше-влак видеош але кагазыш уло шӱм-чоныштым да эн поро шижмашыштым пыштеныт. Самырык журналист-влак кундемын моторлыкшо, пӱрымашыже, историйже нерген шонкаленыт. Комиссийыште палемдат, паша-влак моткоч оҥай да сылне улыт, тунемше-влак темым тӱрлӧ шӧрын гыч почын пуэныт. Сеҥыше-влак радамыште Егор Петухов, София Сутягина, Наталия Номанова, Глеб Комелин, Лиза Титова. Мут толмашеш, ты конкурсыш «Ямде лий» газетын самырык корреспондентше-влакат ушненыт. Нунын коклаште Дима Веденькин, Эмилия Александрова да Егор Петухов.
«Кипяток» йоча газет ынде ик ий утла «Бауманский лицей» пелен пашам ышта. Адакшым тушко районласе тунемше-влакат возат. Йоча-влакым парт кокла гычак профессионал журналистикылан шӱмаҥдат, мастарлыкыштым шуарат. Нуно статьям, интервьюм, заметке-влакым возат, вёрсткым ыштат да фото-влакым тӧрлат. Кеч чыла пашам самырык журналист-влак шкеак шуктат, нунын пелен эре полшаш да ой-каҥашым пуаш ямде «Марийская правда» газетын пашаеҥже-влак улыт.
Комментариев: 0