Россий Правительстве Председательын алмаштышыже Татьяна Голикова федерал кӱкшытыштӧ оперативный штабын заседанийжым эртарен. Тушто вирусым чактарыме нерген, тыгак йот элла гыч толшо студент-влак нергtнат ойленыт. Марий Элыште йот элласе граждан-влак кок ВУЗышто шинчымашым погат. Тачысе кечылан пандемий тӱҥалме дечын вара 47 студент вес элла гыч толын, чыланыштланат тестым ыштеныт, 14 кече самырык еҥ-влак карантиныште лийыныт. Вес элла гыч толшо студент-влак коклаште черланыше-влак лийын огытыл. Ушештарена, республикысе инфекционный стационарлаште 445 вер уло, кызыт тушто 310 еҥ эмлалтеш, 64 еҥ нелын черле, 152 пациент кислород полшымо дене шӱла. Республикыште пытартыш кок арня жапыште кокла шот дене кажне кечын 19 гыч 23 еҥ черлана. Ковид-19 шарлаш тӱҥалмыже дечын вара республикыште эн шуко еҥ Йошкар-Олаште, Медведево район, Волжскышто черланен. Регионышто вакцинаций умбакыже шуйна. Марий Элышке 36 тӱжем дозо Гам-КОВИД-Вак вакциным конденыт, 19 медицин оргнизацийыште 110 пункт пашам ышта, 52 мобильный бригаде уло. 18 тӱжем утла еҥ вакцинацийын тичмаш курсшым эртен.
Комментариев: 0