Марий Элыште икмыняр ий жапыште шӱкым сортироватлыше 4 комплексым чоҥен шуктат. Иктыжым-Козьмодемьянскыште тений пашашке колтышаш улыт. «Экологий» национальный проект, тыгак пеҥгыде коммунал шӱкым перерабатыватлыме нерген регион вуйлатыше Александр Евстифеев пӱртӱс ресурс министр Алексей Киселев дене вашлиймаште каҥашен. Шӱкым перерабатыватлыше комплекс-влакым Морко, Шернур районлаште, тыгак Йошкар-Олаште ыштышаш улыт. Козьмодемьянскыште шӱкым сортироватлыше комплексым улшо полигон воктенак ыштат. Тушто мобильный линий-влак лийыт. Район да ола кумдыкышто ик ийыште 5 тӱжем утла тонн коммунал шӱк погына, садланак капитально чоҥымо объектым огыл, а площадкым ыштат. Тушто модуль-влакын монтажыштым ыштат. Инвестор ойпидышым пеҥгыдемден, монтажым июль-август тылзыште тӱҥалшаш улыт. Федерал закон дене келшышын, шукерте огыл пуртымо вашталтышым шотышко налын, регионлаште коммунал шӱкым перерабатыватлыше комплекс-влак лийшаш улыт. Марий Элыште тыгайжым 2024 ийыште частный инвесторын полшымыж дене чоҥаш палемдат.
Комментариев: 0