Российын историйжым, элыштына илыше калык-влакын тӱвыраштым да йӱлаштым кузерак паледа? Тидым «Кугу этнографий диктантым» возен кажне кумылан еҥ терген кертеш. Акцийын очный этапше изарнян, 3-шо ноябрьыште, Сергей Чавайн лӱмеш Калыкле книгагудышто эртен. Тушко 57 еҥ ушнен – тиде тунемше, пенсионер-влак, пашазе калык. Шке шинчымашыштым Марий Элысе виктерын еҥже-влакат тергеныт. Викториныште 30 йодыш. 20-жо – федеральный кӱкшытан, 10-жо – мемнан республик дене кылдалтын. Тылеч посна тений диктантыш ДНР, ЛНР, Запорожский да Херсонский областьлан историйышт дене кылдалтше йодыш-влакым пуртеныт. «Кугу этнографий диктантым» возаш 45 минут пуалтеш. Практике ончыкта, акцийыш ушнышо-влак йодышлан вашкерак вашештат.
Комментариев: 0