Марий Эл ТВ: Марий Элыште икымше гана «Йоча киноМай» поро кумылым ончыктышо киномарафон тӱҥалын

Йоча-влаклан кино кугу экраныште. Марий Элыште икымше гана «Йоча киноМай» поро кумылым ончыктышо киномарафон тӱҥалын. Тудо Республикысе Курчак театрыште почылтын. У проектын программышкыже киноиндустрийын пашаеҥышт дене усталык вашлиймаш, мастарлык-класс да музыкальный кас-влак пурталтыныт. Кинофестивальын икымше кечынже фильмым «Октябрь» кинотеатрыште, Калыкле Сымыктыш гимназийыште, Йошкар-Оласе художественный училищыште да Люльпан йоча пӧртыштӧ ончыктеныт. Чылаже йоча-влаклан 16 кином чылт яра ончыктат. Кино-влак икшыве да еш ден ончаш келыштарыме улыт. «Честное пионерское» трилогий, «Звёзды мне укажут путь», «Сестрёнка» да моло отечественный кино самырык тукымын поро кумылжым, келшымашым аклыме, кугуракым пагалыме шижмашыжым вияҥдаш полшат.