Марий Элысе мӱй - «Вкусы России» гастрофестивальыште. Тиде кечылаште элнан рӱдолаштыже – Москошто - регионысо бренд-влакын ярмиҥгашт эрта. Мемнан республике гыч тушто Советский район гыч Александр Кузьминын мӱкшотарже. Писте, пеледыш, шемшыдаҥ мӱй – чылажымат теве-теве гына кӱзеныт. Римма Кузьмина ты ярмиҥгаште ынде нылымше гана. Марий Элын чапшым аралаш мӱкшызӧ ешым регионысо ялозанлык министерстве колтен. Ты жапыште, палемда ӱдырамаш, Моско калык марий мӱйым йӧратен шынден, сандене тудым лӱмынак налаш толшо-влакат ятырын улыт. Элнан тӱрлӧ лукыштыжо ыштен лукмо сату-влак дене  ВДНХ-ште, «Калык келшымаш» фонтан шеҥгелне палымым ыштат.