Марий Элысе выпускник-влак кугыжаныш иктешлыше аттестацийлан ямдылалтыт. Республикын туныктыш да шанче министерствыжын уверже почеш, 11-ше классыште тунемше-влак икымше экзаменыштым 1-ше июньышто историй, литератур да химий предмет дене возаш тӱҥалыт. 9-ше классыште тунемше-влакын икымше экзаменышт 2-шо июньышто математике предмет дене лиеш. Выпускник-влакын экзаменышт марте тылзат пеле наре жап веле кодеш. Таче тиде пагытлан республикын кажне гаяк школжо ямдылалтеш. Мут толмашеш, Шернур округ Купран тӱҥ школышто 9 классым тений 7 йоча тунем пытара. Экзаменлан нуно идалык мучко ямдылалтыт.