Калыкле кочкыш ден вургем, этнографий кудо да тÿрлö район гыч чумыргышо уна-влак – чыла тидым Семык пайремыште ужаш лиеш. Семык пайремым ожнысек Российын тÿрлö кундемлаштыже марий-влак тӱшкан пайремлат. Татарстан да Удмурт республикыште гын, Семык кажне ийын кумдан палемдалтеш. Марий Элын делегацийжат кажне гана тушто участвоватла. Тений Одо кундемыште уна-влакым 8 июньышто вашлийыт.
Шушаш каныш кечылаште Йошкар-Олаште «Марий кеҥеж» уремысе фестиваль почылтеш. Тудо икымше гана 2022 ийыште Марий Эл Республик вуйлатыше Юрий Зайцевын кӱштыкшӧ почеш эртен. Тений фестивальлан тӱҥалтышым Москваште ВДНХ-ште Пеледыш пайрем пыштен. А рӱдолаште «Марий кеҥеж» 1 июньышто 11 шагатлан Никонов лӱмеш площадьыште Благовещенский башне дене тӱҥалеш. Фестиваль 31 август марте шуйна. Кажне арнян кугарня, шуматкече да рушарнян рӱдоласе площадкылаште тӱрлӧ мероприятий-влак лийыт.
«Майатул» фестивальын участникше-влак Йошкар-Оласе тӱвыра да каныме паркыште верланыше аллейыш миеныт. Тушто ты фестивальлан пӧлеклалтше аллей уло. Тудо кок ий ондак шочын. Тунам фестивальыш ушнышо театрын еҥышт 5 тӱрлӧ пушеҥгым шынденыт.
Тений шошо шке койышыж дене калыкым чот ӧрыктарен. Апрельыште шокшо шоген гын, майыште игече юалгырак лийын. Тиде вашталтышым утларакшым садпакчазе-влак шижыныт.
Марий книгам Уфаште ончыктеныт. Пошкырт кундемыште «Китап-байрам» книга фестиваль эртен. Марий Эл гыч тушко «Марий книга издательстве» савыктыш пöрт миен. Фестиваль нерген кумданрак Кристина Быкован сюжетыштыже.
Марий Элыште уэш пресс-тур эрта. Тиде кечылаште федерал да регионласе СМИ гыч журналист-влак марий кундемыште лийыт. Ты гана 9 регион гыч 18 еҥ толын. Нунын коклаште утларакше - газет да электрон СМИ пашаеҥ-влак. Икымше кечын журналист-влакым «Марий Эл Телерадио» компаний дене палымым ыштеныт, креативный индустрий школым ончыктеныт. Тыгак эн ойыртемалтше историй да тÿвыра объект-влак дене палдареныт.
Книгашӧрлык у савыктыш дене пойдаралтын. Москваште «Россия» тӱнямбал форум-ончерыште марий археолог-влакын «Предмет. Образ. Символ. К истокам марийской культуры» книгашт дене палымым ыштеныт. Тушто мемнан эра деч 10 тӱжем ий ончыч тӱҥалын 11 курым марте археологий предмет-влакым чумырымо.
РЕПОРТАЖ: ВДНХ-ште - Пеледыш пайрем.
Республикысе курчак театр «Майатул» фестиваль кышкарыште «Йӱксалче» визуально-пластический этноспектакльым ончыктен. Палемдыман, ты фестивальыште театр шке мастарлыкшым икымше гана терген. «Йӱксалче» спектакльыште мемнан съемочный группына лийын.
Йошкар-Олан мэрийыштыже маскироватлыме сетьым пидаш туныктат. Занятий-влак тӱҥалме нерген рÿдӧ олан мэрже Евгений Маслов шке социал кылысе лаштыкыштыже увертарен. Тиде гана сетьым «галстук» технике дене пидыт, тÿс дене кеҥеж пагытлан келыштарат. Кужыт денат ондаксе семын 3 метраным огыл, а 6 метраным пидыт. Тыгайже салтак-влаклан кучылташышт йöнанрак - палемдат организатор-влак. Палемдыман, сетьым пидаш туныктымо занятий-влак олан администрацийыштыже ынде икымше гана огыл эртат. Кажне гана йöным да жапым муын изижат-кугужат тышке кумылын толеш. Вет мемнам тачысе кечын икте ушен шога: боец-влаклан полыш кидым шуялташ да мо дене гынат полшаш.
