Пандемийлан кӧра, тоштер-влак пытартыш тылзылаште фонд-влак дене пашам ыштеныт, экспозицийым уэмденыт. Кужу жап дечын вара «Ший пӱан Ший пампалче» («Сереброзубая Пампалче») марий йомак тоштер 14 июль гыч ончышо-влаклан выставке-влакым ончаш темла. 

Мемнан республикыште йот эл гыч толшо-влак коронавируслан тергалтшаш улыт. Тидын шотышто Марий Элын Тазалыкаралтыш министерстве улшо приказышке ешартышым пуртен. 

Шокшо игечыште чодыра пожар лийын кертме лӱдыкшӧ шукемеш. Республикыште 13 июльлан 20 тулазап лийын. Тул 6 гектар ужар кумдыкым авалтен. 

«Экологий» национальный проект дене «Чодыра-влакым аралымаш» регионысо проект дене келшышын республикыште «Авиалесохранын» техникыже да оборудованийже уэмеш.