«Марий Чодра» национал парк шке кумдыкышкыжо оксам тӱлен пурташ тӱналын. Тиде вашталтышым ик эн ончыч Яльчик ер дек мийыше-влак шекланеныт. Ер дек кудал пурымо корнышто паркын пашаеҥже-влак кажне толшо еҥ деч 250 теҥге дене погаш тӱналыныт.
Медведево район Сурок посёлкышто у футбол пасум ямдылат. Тиде ачалымаш «Комплексное развитие сельских территорий» программе почеш шукталтеш.
Йошкар-Оласе троллейбус-влак пашам ыштыме жапыштым шуеныт. Эртыше арнян икмыняр маршрут дене коштшо троллейбус-влак эрдене эррак лектыныт. Йӱдымат 10 шагат деч вара икмыняр маршрут дене ешартыш троллейбусым колтымо.
Марий Эл Республикын тӱҥ федерал инспекторжо Павел Волков марий шанче да шымлыше институтыш миен коштын. Инстиутын вуйлатышыже Евгений Петрович Кузьмин тудым институтын пашаже дене чакрак палыме ыштен да шукташ шонымо паша радам дене палдарен.
Уголовно-исполнительный системын вуйлатышыже еҥ-влакын йодышыштлан вашешта. 21 июльышто телефон дене «вияш линий» эртаралтеш. Ведомствын пашаже, тыгак пашазе-влак нерген йодышым «68-65-01» телефон номер дене 16.00 шагат гыч 17.00 шагат марте пуаш лиеш.
Йошкар-Оласе больницылан экстракорпоральной мембранной оксигенации (ЭКМО) аппаратым налыныт. Тудым акше 7 миллион наре теҥге. Тудым Россий Правительствын резерв фондшо гыч налыныт.
Кугыжаныш пожар надзор службо республикыште улшо 250 школ гыч 39 терген. Кок тунемме верыште автоматический сигнализаций да эвакуаций вер-влак шотлан келшен толын огытыл.
