Кумдан чапланыше «Черемис» мурылан клипым войзеныт. Марий Эл Республикын 100 ияш лӱмгечыже вашеш кундемнан кумдан чапланыше артистше, Марий Элын калык артистше Вячеслав Созоновын йоҥгалтарыме «Черемис» мурылан клип шочын.
Пытартыш суткаште республикысе инфекций стационарла гыч 88 еҥым лукмо. Тидын годымак 36 еҥым госпитализироватлыме. Тӧрланыше еҥ-влакын чотышт кок пачаш шукырак.Тыге, Минздравын уверже почеш, республикысе инфекций стационарлаште 589 еҥ эмлалтеш.
Российын Президентше «Курымашлык полкым» кусарыме нерген ойлен. Специалист-влак дене каҥашен налме деч вара, Владимир Путин «Курымашлык полкым» 2021 ийыш кусарыме темлымаш дене келшен.
Кеҥеж тургым – пайрем-влаклан поян. Поснак тиде жапыште у еш-влак чумыргат. Но коронавирус инфекций шарлымым чактарыме амал дене ик жаплан ЗАГС-влак ешым регистрироватлаш заявленийым онлайн йӧн дене налыныт да уна-влакымат ЗАГС пӧлкаш пуртен огытыл.
Благовещенский башньыште марий-влакын акрет илышыштлан пӧлеклалтше ончер пашам ышта. Евсеев лӱмеш тоштерын «Караванный путь марийцев от Волги да Урала» лӱман ончерыште, курык, олык да эрвел марий-влакын илыш йӱлашт дене кылдалтше тошто арверым, ӱзгарым да вургемым ужаш лиеш.
20 июль гыч Марий Эл республикысе еш-влаклан кумшо йочалан да 3 гыч 7 ияш марте йоча-влаклан оксам тӱлаш тӱҥалыныт. Ушештарена, «Демография» национал проект почеш ешыште кумыт да кумыт деч шукырак йоча уло гын, - икшывын 3 ийым темымешкыже кажне тылзын ешлан оксам тӱлаш тӱҥалыт.
