Шыжым Йошкар-Олаште «ший» волонтерствын рӱдерже почылтеш. Тиде проектым илышышке пурташ активист-влак шке проектыштым «Регион добрых дел» российысе конкурсышко колтеныт. Тудо «Образований» нацпроектын «Социальная активность» федерал проект дене келшышын эртаралтеш. Ӱмаште «Серебряные» волонтеры» проект федерал грантым сеҥен, тудын дене келшышын, республикыште рӱдерым ышташ да чыла районысо волонтер-влакым ушаш шонат.
«Шарнымаш парклан йомаш огына пу». Аграрно-строительный техникумын студентше-влак «Ик йÿк дене» ойлат. 13 ий нуно Советский районысо У Ургакш ялыште верланыше «Тихие зори» лӱман паркым эрыктен да арален толыт. Тудым эше 33 ий ончычак почыныт. Тиде жапыште йыр улшо пече, капка да канаш келыштарыме устел ден теҥгыл палынак тоштемыныт. Садлан студент-влак паркым тӱзатен уэмдаш тӱрло йӧным кычалыт. Тидлан келшыше проектымат возеныт.
Оршанка район «Лӱдыкшыдымо да сай качестван автомашина корно» национальный проектышке кумшо ий почела ушнен. Тиде кундем Йошкар-Ола агломерацийышке пура. Тачысе кечылын индеш корным тӧрленыт: тиде Стахановский, Пушкин, Родигин, Рабочий, Юбилейный да молат.
Ветеринарий комитет орымаш чер дечын прививкым 1500 утла пий да 500 утла пырыслан шынден. Кодшо кечылаште тиде ведомство Россельхознадзор виктем дене пырля совещанийым эртарен. Тушто орымаш чер нерген мутланеныт. Тений икымше квартАлыште 9 тӱжем утла тӱкан шолдыра вольык, 2 тӱжем утла изи вольык, 35 имне, 1552 пий да 524 пырыслан прививкым шынденыт.
Кажне ийын 100 тӱжем дозо вакциным чодыралашке оптат. Ешарен кодаш лиеш, 2021 ийыште республикыште орымаш чер вашлиялтын огыл.
