В Йошкар-Оле вновь стартует проект «Зеленый фитнес»
- Дата: 16:13, 13-05-2021
- Просмотров: 1 423
Йошкар-Олаште «Весенная капель» лӱман иймаш дене республикысе таҥасымаш лийын. Кундемыштына спортын тиде тӱрлыкшӧ дене ятыр еҥ кылым куча: любитель-влакат, профессионал-влакат тиде радамыште улыт. Олимпийский резерв спорт школын тунемшышт российысе турнирлаште сай кӱкшытым ончыктат. Шукерте огыл спортшколлан «Спорт-илышын нормыжо» федерал проект дене келшышын инвентарьым да экипировкым налыныт. Черетан таҥасымаш йоча-влакын кӱкшытыштым пеҥгыдемден. 2 кечыште 329 участник шке писылыкшым ончыктен, сеҥыше-влакым медаль да диплом дене палемденыт.
Пытартыш суткаште республикыште кок чодыра пожар лийын, иктыже Звенигово район Уржум чодыра озанлыкыште, тушто йӱлымӧ кумдык кугу лийын огыл, а теве Яльчик чодыра озанлыкыште 3 гектар ужар кумдык йӱлен. Сад товариществылаштат пожар-влак лиедат, пытартыш суткаште 5 гана кукшо шудо, 2 гана шӱк коштыра йӱлаш тӱҥалын. Тидын нерген МЧС-н регионысо виктемже палдара.
Рӱдӧ олаште илыше мошенник-влакым ик миллионат 700 тӱжем теҥгелан пойдарен. 39 ияш ӱдырамаш вигак огыл гынат, ондалыше-влаклан ныл кредитым налын пуэн. Мартыште ӱдырамашлан пуйто банкын сотрудникше йынгыртен да тудын лӱмеш кредитым налаш тыршыме нерген ойлен.
Марий кӱслезе-влакым фея дене таҥастареныт. Калыкле сымыктыш гимназий Моско олаште эртыше «Во имя жизни» лӱман социокультурный проектышке ушнен. Тудо Сеҥымашын 76 ияш лӱмгече кышкарыште эртаралтын. 4 кече жапыште ӱдыр-влак тӱрлӧ номинаций дене танасымаште вийыштым тергеныт да 1 вер дене пӧртылыныт.
Марий Элыште «Юнармийын самырык корреспондент-влакын школышт» лиеш. Тиде проектым шыҥдарыме йодышым Йошкар-Олаште «Парк Патриот Медиа» автономный коммерческий огыл организаций дене пырля каҥашеныт. Самырык журналист-влакын тыгай школышт икмыняр регионышто пашам ыштат.
Республикысе онкологий диспансерым у кӱкшӧ технологиян оборудований дене пойдареныт. Техникым «Здравоохранений» национальный проектын «Онкологий чер дене кучедалмаш» регионысо проект дене келшышын налыныт. Оборудований рак черым тӱҥалтыш стадийыште палаш да эмлаш полша. Тыге мутлан, лучевой терапийым ышташ аппарат чер дечын вара нелылыкым куштылгыракын эртараш полша. Тыгак хирургический операций-влакланат у оборудованийым налыныт. Тидын дене пырля диспансерыште у эндоскопический устройство, УЗИ аппарат, компьютер томограф улыт. Тазалыкаралтыш министертсве палдара: Марий Элыште онкологий дене учетышто 14 тӱжемат 750 пациент шотлалтеш, кажне визымшын коваште рак.
Юл кундемысе федерал округ кӱкшытыштӧ оборонно-промышленный комплекс сферыште пудыртымаш-влак шотышто каҥашеныт. Нижний Новгород олаште Россий Президентын ӱшанъеҥже Игорь Комаров заседенийым эртарен. Тудын пашашкыже Российын Генеральный прокуратурыжо, ФСБ, МВД, антимонопольный, налог службо-влак, Росфинмониторинг ушненыт. Полпред палемден: округышто правам аралыше да тергыше орган-влак кӱлеш йӧн-влакым кучылтын, икте-весе дене вашкылым пеҥгыдемденыт. Чыла регионышто ведомство-влак кокласе пашаче группо-влак улыт. Игорь Комаров ешарен: военно-технический продукций, тудын качествыже, пашалан да сатулан тӱлымо шотышто жапым пудырташ огыл манын, ешартыш пашам шуктыман.
Кок ий жапыште республикыште «Лӱдыкшыдымӧ да сай качестван автомашина корно» нацпроект дене келшышын палемдыме паша жапыштыже ышталтын. 2019 ийыште план дечын 22 километрлан, а 2020 ийыште 30 километрлан шукырак корным тӧрленыт. Корным чоҥымо нерген Российыште регион-влак вияҥмаш шотышто правительстве комиссий президиумын заседанийштыже ойленыт. Тудым видеоконференций йӧн дене Россий Правительстве председательын алмаштыштыже Марат Хуснуллин эртарен. 2024 ий марте республикыште нацпроект дене келшышын ик тӱжемат 372 километр корным тӧрлышаш да чоҥышаш улыт. Тиде – республикыште улшо корныла гыч 45 %. Тений 211 километр корным ыштышаш улыт, пашам шукташ чыла контрактым пенгыдемдыме.
Пугачев тумо элын тӱҥ пушеҥгыже лийын кертеш. Российыште тидын шотышто йӱклымаш тӱҥалын. Тидын нерген «Пушеҥге – пӱртӱсын илыше памятникше» российысе программын порталже увертара. Мемнан элыште илыше-влак шке йӱкыштым 2021 ий 1 август марте пуэн кертыт. Чылаже конкурсышто тӱрлӧ регионла гыч 47 участник уло. Тидын радамыште Марий Эл гыч Пугачев тумо. Тиде пушеҥге Волжский районышто верланен. Легенде дене келшышын, тудын воктене Емельян Пугачев канен. Пушенге 26 метр кӱкшытан, лопкытшо 1 метр утларак. Шымлымашым эртарыме дечын вара пале лийын, пушеҥге 1600 ийыште кушкаш тӱҥалын. Кажне ийын Пугачев тумын сылнылыкшым ончаш ятыр еҥ, турист толеш.