«Йӱд оролым» англичан йылме дене лудаш лиеш. Денис Осокинын ойлымашыжым Канадысе «Эллипс» журнал савыктен. Ойлымашыжым писатель Ирина Садовина кусарен. Тидын нерген тӱвыра министерствын пресс-службыжо увертара. «Йӱд оролым» ойлымаш почеш Республикысе курчак театр 2018-ше ийыште спектакльым шынден, а 2019-ше ийыште Денис Осокин пьесын авторжо семын театр сымыктыш аланыште Шкетан лӱмеш Марий Эл Кугыжаныш премийын лауреатше лийын. Тыгак книгалан автор 2020-шо ийыште Татарстан республикын Габдулла Тукай лӱмеш Кугыжаныш Премийже дене палемдалтын. Ушештарена: этнофутурист мистерий кодшо ийын «Шӧртньӧ маске» Российысе калыкле театр премийым налын.
Кумылан-влак «Ава да йоча-влак калык вургем дене» фотоконкурсыш ушнен кертыт. Кызыт тиде тӱнямбал конкурсыш йодмашым налаш тӱҥалыныт. Чылаже 150 финалистым да 20 сеҥышым увертарат. Фотоконкурсын лектышыже почеш Москосо ВДНХ-ште 16 октябрьыште «Ава да йоча-влак калыкле вургем дене» фотоончер ышталтеш. Конкурсым “Ӱдырамаш-влакын интернационал ушемышт» эртара.
Марий йылме дене регион-влак кокласе кӱкшытан олимпиаде тений заочно йӧн дене эрта. Тушто шке шинчымашыштым Татарстан, Башктортостан республикыла, Свердловский область гыч тунемше-влак тергаш тӱҥалыт. Ешарен кодаш лиеш, марий йылме дене республике кӱкшытан олимпиадышкыже кундемнан районлаж гыч ӱдыр-рвезе-влак толыныт, а теве ИКН дене олимпиаде тений заочно эртен.
Изи Карина черетан фестивальыште ойыртемалтын. Иваново олаште «Уникальные люди» инклюзивный фестиваль эртен. Пандемийлан кӧра тудо онлайн лийын. Тазалык дене эмганен вияҥше-влак тӱрлӧ шӧрыныштат шке усталыкыштым ончыктеныт. Изи Карина Ава нерген мурым йоҥгалтарен да вокал номинацийыште Гран-При да окса премий дене палемдалтын. Ешарен кодаш лиеш, Карина Звенигово район Кожласолаште ила. 13 ияш ӱдырым шошым Санкт-Петербург олашке вес конкурсышко ӱжыныт.
Марий Элышке «Спутник V» вакцинын у партийже толын. Прививке кампанийым тӱҥалме дечын вара регионышко чылаже 20792 дозо вакциным конденыт. Тидын нерген регионысо тазалыкаралтыш министерстве увертара. 24 февральысе данный дене, Марий Элыште 12 тӱжемат 754 еҥ коронавирус дечын прививкым шындыктен, вакцинын тичмаш курсшым 2 тӱжемат 358 еҥ эртен. Вакцинацийым шке кумылын яра кажне еҥ шынден кертыт. Имммунизацийышке кугыеҥ-влак кум йӧн дене возалтын кертыт: «Госуслуги» портал гоч онлайн, тыгак «122» номер дене кол-рӱдер гоч але поликлиникышке миен. 2021 ий мучаш марте республикыште илыше-влак гыч 60% прививкым шындышаш улыт.
