- Дата: 09:55, 2-05-2024
- Просмотров: 529
РСФСРын сулло артистше Иван Якаевын лӱмжым курымешлан арален коденыт. Актёрын илыме пӧрт пырдыжешыже, Ленинский проспект, 19-ше адрес дене, шарныктыш оҥам вераҥденыт. Оҥам почмо йÿлам шукташ Шкетан лÿмеш марий кугыжаныш драме театрын художественный вуйлатышыже Василий Пектеев ден самырык артист Иван Соловьёвлан ӱшаненыт. Погынымаште Иван Якаевым поро мут дене шарналтеныт. Могай тудо лийын, кузе сценым йӧратен да молан шке пашажым пагален, каласкаленыт. Оҥай историй-влак дене палдареныт.
Келге содержаниян сылнымут произведенийым кычалыт. Марий Элыште «Эн сай марий пьесе» конкурс кая. Икымше гана тудо 2003-шо ийыште эртаралтын. Кок ийлан ик гана эртаралтше конкурс республикысе марий театрын сценыштыже шындаш йöршö пьесе-влакым ойыраш полша.
«Образование» нацпроект почеш республикысе школ-влакым уэмдат. Тылеч посна у технике дене пойдарат, тÿрлö ешартыш программе-влакым пуртат. Кызыт У Торъял районысо Данил Онар лÿмеш Токтарсола школышко миен толаш темлем.
Марий сылнымут иктыш ушен. Морко районысо Коркатово лицейыште «Сылнымут шошо» литератур семинар лийын. Йоча-влак сылнымут саскаштым йоҥгалтареныт. Ончыкыжым почеламут-влакым иктыш чумырен, «Сылнымут изолык» книгам савыктат. Тыгак сылнымут пайремыште Гавриил Яковлев лӱмеш увертарыме конкурсым иктешленыт. Кумданрак Эльвира Петрован сюжетыштыже.
Республикыштына тÿвыра объект-влакым тöрлат. Йошкар-Олаште илыше-шамычын Рÿдö каныме парк – ик эн йöратыме верышт. Кызыт паркыш пурымо верыште реставрацийым ыштат.
Шошын ик эн кугу пайремже - Кугече лишемеш. Тений тудым 5 майыште палемдена. Акрет годым кугезына-влак ты пайрем вашеш, йырваш ылыжше пӱртӱсым чапландарен, еш да тукым, кундемысе мер кумалтыш-влакым эртареныт. Тачысе кечын Кугече годым кумалтышке Шернур районысо Марисола кундемыште лектыт. Кугече деч ончычсо арня мучко, кажне кечын могай-гынат йӱла шукталтеш.
Йошкар-Олаште Тӱссымыктыш галерейыште «Единение. Суриковцы» ончер почылтын. Тушко Василий Суриков лӱмеш Москосо художественный институтым тунем пытарыше-влакын пашаштым аклаш луктыныт. Тиде ончерым Российын сулло сӱретчыже, ты институтым пытарыше Иван Ямбердов чумыраш темлен.