Регион вуйлатыше Юрино районышто паша дене лийын. Ик эн ончыч Марьино-Юрино автомашина корно тӧрлымым ончен. Тиде корным икмыняр ий ышташ палемдыме, тачысе кече марте 25 километр гыч 16-шым ыштыме, вес ийын пашам мучашлат. Тений план дене ыштышаш корным, регион вуйлатышын кӱкштымашыже дене, ончылгоч чоҥеныт. Юрино поселкышто тыгак Кочетов уремыште корным тӧрленыт. Тидлан 9 миллион теҥге ойыралтын. Рӱдӧ уремлан шотлалтше 8 километрым шотышко конденыт. Тений тыгак «Поветлужье» Нижний-Новгород-Йошкар-Ола кугорным тӧрлат, план дене Копорулиха-Озерки марте 47 километрым тӧрлышаш улыт.
Юрино поселкышто Александр Евстифеев Карл Марск уремыште кужун чоҥымо пӧртым ончен. Шуко пачеран пӧртым 2001 ийыште чоҥымым чарненыт, кодшо ийын объектым у подрядчик налын, но тудат объектым пашам сайын шуктен огыл, кызыт вес подрядчиклан правам кусарыме йодышым ончат. Чоҥымаш министр Михаил Степанов палдарен: тений пӧртын пырдыжшым ыштен шуктышаш улыт. Январьыште регион вуйлатыше тиде объект нерген тыге каласен: республикын правильствыже тиде пӧртыштӧ пачер-влакым врач да туныктышо-влаклан пуа.
Комментариев: 0