Коронавирусын у штаммже – «Омикрон» еҥ-влакын тазалыкыштлан эшеат кугу лӱдыкшым ыштен кертеш. Тидын нерген тазалыкаралтыш министр Марина Панькова журналист-влак дене вашлиймаште палдарен. Республикысе тазалыкаралтыш системе тидлан ямдылалтеш, койко-вер-влакым 20 процентлан шукемдат, эм препарат-влакым ситарат. Еҥ-влакат тидын жапыште аралтыш нерген шарнышаш улыт. Маске, социал дистанций да эн тӱҥжӧ вакцинаций да ревакцинаций. Шымлымаш-влак ончыктат, вакцинацийым эртыше-влакын черланымаш куштылгыракын эрта. Тиде арняште республикште самырык-влаклан вакцине толын шушаш. Нунылан коронавирус дечын прививкым ача-ава-влакын кӱштымашыже дечын вара, медицин организацийлаште шындаш тӱҥалыт.
Комментариев: 0