Коронавирус дене черле пациент-влак дене пашам ыштыше специалист-влак республикын ик эн сай здравницыштыже канаш тӱҥалыт. «Сосновый бор» санаторий оперативный штабын темлымашыже дене, пандемий жапыште, кокымшо этапышке куснымаште, каныме базе семын ойыралтын. Республикыште коронавирус дене ситуаций куштылго огыл.
Норматив дене улшо 340 верым 810 марте шукемденыт, кажне кечын инфекционный стационарлаште пациент-влак шукемыт. Таче кечын 600 утла эмлалтеш. Вашке полыш, 8 инфекционный стационар, лабораторийлаште пашам ыштыше-влаклан неле условийыште пашам ышташ логалеш. Специалист-влак гыч 200 утла коронавирус дене черланен, эмлалтыныт. Тидын шотышто республике правительствын резерв фондшо гыч 4 миллионат 802 тӱжем теҥгем ойыреныт. Тиде окса дене путевкым налыт. Медицин пашаеҥ-влакын икымше тӱшкашт «Сосновый бор» санаторийышке 20 июльышто толеш да 14 кече кана. Чылаже 175 специалист канышаш.
Комментариев: 0