2020 ийыште республикысе Тазалык аралтыш министерстве «Земский доктор» да «Земский фельдшер» программа дене 12 вашкелшыкым пеҥгыдемден. 7 врач ден 5 фельдшер ялыш пашам ышташ куснен.
Медведевысе рӱӧо эмлымверыш 2 невролог, тыгак Аксарка ФАП-ыш фельдшер пашам ышташ толыныт. Оршанкысе эмлымверыште рентгенолог, участковый терапевт, участковый педиатр да акушер-гинеколог шке пашаштым тӱҥалыныт. Тиде районын, тыгак Советский, Волжский районласе ФАПлаште самырык фельдшер-влак тыршат.
2020 ийыште ялыш пашаш каяш шонышо 29 врач да 13 фельдшер дене вашкелшыкым пеҥгыдемдаш палемдыме. Республикыштына «Земский доктор» программе 2012 ий гыч, а «Земский фельдшер» - 2018 ий гыч илышыш шыҥдаралтеш. Чылаже тиде жапыште 99 врач да 10 фельдшер дене вашкелшыкым пеҥгыдемдыме. Ондак тыгай врачлан компенсацийым тӱлымо ак 1 млн. теҥгеш шуын гын, фельдшерлан - 500 тӱжем. 2020 ийыште программыш «труднодоступные и удаленные районы» виктышым пуртымо. Тудын почеш пашаш пурышо эмлызе 1 миллионат 500 тӱжем теҥгем, а фельдшер 750 тӱжем теҥгем налын кертеш. Кызытсе жаплан, Волжск, Звенигово, Килемар, Морко, Шернур да Советский районлаште, тыгак Козьмодемьянск олаште врач ден фельдшер-влак кӱлыт.
Комментариев: 0