Оршанкыште тоштемше пӧртла гыч еҥ-влакым кусараш у пӧртым чоҥен шуктат. У пачерлашке лишыл жапыште 50 еҥ кусна. Пӧртыштӧ 33 пачер, 22-шым Табашино да Оршанка гыч программын участникше-влаклан ойырат. Пӧртсийым нуно вес идалык тӱҥалтыште вашлийыт. Регионысо чоҥымаш министерствыште палдарат: 2023 ий мучаш марте республикыште шуко пачеран 11 пӧртым чоҥен шуктышаш улыт. Тиде Волжск да Козьмодемьянск олалаште, тыгак Волжский, Куженер, Марий Турек, Морко, У Торъял, Оршанка, Параньга да Шернур районлаште. Программын мучашлалтмыже дечын вара вес этап тӱҥалеш, у илымверым 2017 ий гыч 2022 ий марте тоштемше пӧртлалан шотлалтше пачерлаште илыше-влаклан пуаш тӱҥалыт.
Комментариев: 0