Самырык еҥ-влакым шанче пашалан кумылаҥдат. Марий Элыште «Изирак Евсеевский лудмаш» конференций эртен. Тушко 11 гыч 18 ияш марте школышто да СУЗ-ышто тунемше 30 утла ӱдыр-рвезе ушнен. Самырык шымлызе-влак шке туныктышышт дене пырля экологий, историй да туризм дене кылдалтше пӱсын шогышо йодыш-влакым лончыленыт. Нунын пашаштым кум секцийыште акленыт. Тиде «Пӱртӱс. Экологий», «Археологий. Историй. Этнографий» да «Музеологий. Туризм». Тунемше-влак неле теме деч лӱдын огытыл. Нуно шуко йодышым рашемденыт, марий кундемыште тыршыше еҥ-влакын илыш корныштым шергалыныт, шке тукымвожыштымат шымленыт. Шанче аланыште икымше ошкылым ыштыше ӱдыр-рвезе-влакын пашаштым Марий Элысе учёный да историк-влак акленыт. Нунын радамыште Сергей Свечников, Марина Мамонтова да молат. Конференцийыш ушнышо-влаклан эксперт-шамыч пайдале каҥашым пуэныт. Ситыдымашышт нерген шижтареныт да ончыкыжым проектым кузе вияҥдаш лийме нерген ойленыт. «Изирак Евсеевский лудмашын» организаторжо-влак теве мом палемдат: ончыкыжым ежегодникым ышташ шонат. Варажым тиде савыктышыш йоча да студент-влакын ямдылыме эн ойыртемалтше пашаштым пуртат.
Комментариев: 0