Регион вуйлатыше Юрий Зайцев калык дене приемышто вашлийын. Йошкар-Олаште илыше Евгения Гуляева Аницферов урем, 27 адрес дене пӧртым капитально тӧрлымӧ нерген йодын. Мэр Евгений Маслов палемден, план дене тиде пӧртым 2038-2040 ийлаште тӧрлышаш улыт ыле, но йодмаш почеш, тиде жапым уэш ончен лектыныт. Вес ийын пӧртын фасадшым да леведышыжым тӧрлат. Кузнецово селаште илыше Анжела Соснина Садовый уремыште уда корно нерген ойлен. Тидын шотышто тыгай вашмутым пуэныт: «2023 ийыште Медведево районлан целевой субсидийым ойырат, тиде окса дене верысе корно-влакым тӧрлаш тӱҥалыт». Людмила Коноплёва регион вуйлатыше деке тыгай йодыш дене толын: Йошкар-Ола – Советский маршрутым Ургакш поселко гыч колташ гын, сай ыле. Транспорт да корно озанлык министрын алмаштышыже тиде йодышым рашемдаш да эше ик гана ончен лекташ сӧрен.
Комментариев: 0