Йошкар-Олаште Ширяйково микрорайонышто эҥер серыште дамбым ышташ палемдыме. Тидын нерген Юрий Зайцев Российысе пӱртӱс аралтыш министр Александр Козлов дене мутланен. Марий Элын вуйлатышыже палемден, Йошкар-Оласе Ширяйково микрорайонышто илыше калык вӱдшор годым нелылыкым шижеш. Кажне шошым 40 наре пӧрт, школ да йочасад зданийыш вӱд пура. Тиде экшыкым кораҥдашлан серым пеҥгыдемдыман – тидлан тушто лӱмын келыштарыме конструкцийым вераҥдыман, палемден Юрий Зайцев. Александр Козловын ойлымыжо почеш, ныл километр утла кужытан аралтыш сооруженийым чоҥашлан проект-смете документаций ямде. Федерал бюджет гыч окса полышым налашлан документым ыштыман. Тидын деч вара 2024-2026-шо ийлаште финансированийым ойырымо йодышым виктараш йӧнанрак лиеш. Тидын деч посна Марий Элысе Виктерлан Черный Ключ, Ургакш, Нуж да Туньинка эҥерлаште гидроузел-влакым капитально олмыктен пытараш субсидийым пуат. 2023-2025 ийлаште регионлан чодыралаште пожарым чактараш да тулым йӧртышӧ техникым налашлан 80 милион утла теҥгем ойырат. 
Комментариев: 0