Марий Элыште Российысе чоҥымаш министерствын полшымыжо дене социал инфраструктур вияҥеш. Марий Эл вуйлатыше Юрий Зайцев чоҥымаш да илымверкоммунал озанлык министр Ирек Файзуллин дене вашлийын. Регион вуйлатыше палемден, нацпроект да республикын посна социал вияҥмаш программыже почеш кундемыште сай вашталтыш-влак улыт. 2023 ийыште республикыште келшымаш пӧртым чоҥымо, тыгак рӱдӧ олаште перинатал рӱдерын корпусшым, набережныйын Ленин проспект гыч тӱҥалын Йошкар-Олан 400 ий темме лӱмеш парк марте ужашыжым реконструироватлыме. Тений тыгак Черняков уремыште «рекреационный» манме кумдык лиеш. Тудо Йошкар-Олам да Медведево поселкым ушаш тӱҥалеш. Регионысо проект почеш 30 объектыште чоҥымо да капитально тӧрлымӧ паша шукталтеш. Нунын радамыште ‒ 7 вӱдпуч объект, 4 тазалыкаралтыш объект, 3 очистной сооружений, У Торъял районысо физкультур да тазалыкым пеҥгыдемдыше комплекс, Медведевысе сымыктыш школ. Тачысе кечын «Туныктыш» нацпроект кышкарыште кок школ чоҥалтеш, а тиде ‒ Йошкар-Оласе Восточный микрорайонышто да Руэм поселкышто. Российысе чоҥымаш министр кундемыштына илымвер фондын вияҥмыжым палемден. Тений 7 тылзе жапыште республикыште 292 тӱжем наре квадрат метр илымверым чоҥымо. Тиде пашам Ирек Файзуллин умбакыжымат виктараш кӱштен. Тыгак вашлиймаш кышкарыште регионысо илышкыл коммунал озанлыкын модернизацийже нерген мутланеныт. Юрий Зайцев кӱлешан социал объект-влакым чоҥымо, реконструкций ден илымвер коммунал комплексым модернизироватлыме шотышто йодыш-влакым рашемдаш полшымылан Россий чоҥымаш министрлан тауштен.
Комментариев: 0