У Торъял районысо икмыняр ялышке теле вашеш канде тул толын. Кугу Вӱръялыште газым пайремлын чӱктеныт. Еҥ-влакым куан тат дене регион вуйлатыше Юрий Зайцев саламлен. Ты районысо куд ялышке канде тулым пуртеныт: Васлисола ден Эҥерӱмбал, Кӱанпамаш, Пектансола, Изи да Кугу Вӱръялышке. Чылаже 162 пӧртышкӧ газым пурташ йӧн лектын. Тидлан 22 километр газ пучым да 11 километр распределительный сетьым шупшыныт. Еҥ-влаклан догазификаций дене документым ышташ йӧнанрак лийже манын, ялышке мобильный офис толын коштын, тыгак тушто ял калык оборудованийымат налын кертын.Вес ийын У Торъял районын Кремленки да Шерешнур ялышке газым пуртат. Каласыман, Марий Элыште газификаций 83 процентышке шуэш, эл мучко тиде показатель ‒ 74 процент. 2021-2025 ийласе вич ийлан келыштарыме программе дене келшышын, 198 километр газ пучым шупшыт, 60 ял ден селашке канде тул толеш.
Комментариев: 0