Килемар кундемысе Визимьяр школ гыч тунемше-влак СВО боец-влаклан 100 утла кӱпчыкым ургеныт.

Визимьяр школышто 5-9 класслаште тунемше-влак технологийым туныктышо Ольга Чеснокова дене пырля госпитальлаште эмлалтше военнослужащий-влаклан кӱлеш арверым ямдылат. Технологий кабинетыште ургымо машина-влак эре пашам ыштат. Тунемме ийыште йоча-влак шке кидышт дене ынде 100 утла кӱпчыкым ургеныт. Тылеч посна школышто тунемше ӱдыр-влак моло кӱлешан арверым ургат. Визимьяр школ ден Арде гыч гуманитар полышым чумыраш полшышо-влак черетан полышым ямдыленыт. Лишыл жапыште тудым госпитальлаш да боец-влаклан передовойыш колтат.