Марий Элысе корнылаште фотовидеофиксацийын 230 стационар комплексше пашам ышта
Регионысо транспорт министерствын данныйже почеш, камерым республикын чыла лӱдыкшӧ участкыштыже шындыме. Нунын тӱҥ задачышт -ДТП шижтараш. Тиде амал дене комплекс-влакын верланымыштым эреак ончен лектыт. Тений идалык тӱҥалтыш гыч чылаже 12 устройствым кусарыме. Кушто стационар комплекс-влакым технически шындаш ок лий, тушто автономный камер-влакым вераҥдат. Регионысо корнылаште кызыт куд тыгай камер уло, эше нылытым идалык мучаш марте шындат. Неле грузым шупшыктышо транспортым тергымыланат тӱткыш ойыралтеш. «Козьмодемьянск — Кугу Сундырь» автомобиль корнын 29 меҥгыштыже нелытым тергыше пункт угыч пашам ышташ тӱҥалын. Олмыктымо да тергыме деч вара 9 ноябрь гыч тудым эксплуатаций режимыш кусарыме.























