Республикысе район ден олалаште йочасад-влакым чоҥаш. Тыгай задачым регион вуйлатыше Александр Евстифеев шынден. Каныш кечылаште вуйлатыше Йошкар-олаште чоҥалтше але ачалыме верлаште лийын, совещанийым эртарен. Эн ончыч Сомбатхей микрорайонышто «Красная шапочка» йочасадын оралтыжым ончалын. Ончыч тушто «Росток» рӱдер лийын, кодшо ийын сентябрьыште тудо у верышке куснен. Кызыт тудын зданийжым йочасадлан келыштарат, кӧргӧ помещений-влакым тӧрлат, пищеблокым саемдат. Январь тылзыште тушко 75 икшыве толшаш.
Регион вуйлатыше тыгак «Мирный» микрорайонышто йочасадым чоҥымо верыште лийын. Тушто 320 верлан йоча тӧнежым нӧлтат, контрактын акше 223 миллион теҥге. Таче кечын икымше пачашым ыштеныт, май марте йочасадым нӧлтен шуктышаш улыт, ноябрьыште отделке дене пырля пашам мучашлаш палемдат.
Марий Эл вуйлатыше эше ик верыште лийын. Тиде Йошкар-Оласе ончычсо кермыч заводын кумдыкыштыжо. Ончыкыжым тушто 320 верлан йочасадым чоҥаш йодыш шога. Регион вуйлатыше палемден, йочасад-влак чоҥалташ тӱҥалыт гын, демографий саемеш.
Тений тыгак йочасад-влакым районлаштат чоҥат. Медведево районышто кум йочасадым нӧлтышаш улыт. Тиде Нурмаште 50 верлан, Руэмыште, Медведево поселкышто 100 верлан. Кокытшо дене чоҥымо пашам шукташ конкурс эрта, иктыже дене лишыл жапыште документаций ямде лиеш.
Комментариев: 0