Александр Евстифеев правительствын заседанийжым эртарен да палемден: республикысе кучем Президентын кӱштымашыжым шуктымашке кӱчык жапыште ушнышаш. Туныктыш да шанче министерстве лишыл жапыште йоча-влаклан канаш кайымылан путевкын акше гыч 50 процентшым пӧртылтымӧ шотышто нормативный актым пеҥгыдемдышаш, тидын дене пырля ведомство 2024 ий марте ныл школым чоҥен шукташ федерал программыш ушнышаш: Йошкар-Олаште Юбилейный, Восточный да 9-ше микрорайонлаште, тыгак Медведево районысо Руэм поселкышто школ-влакым чоҥымо проектым колтышаш улыт. Республикыште 99 школ маршрут почылтшаш, 78 у автобусым налшаш улыт. Туризм сферым вияҥдаш «Туристический кэшбек» программе дене умылтарыме пашам шуяш, республикысе туризмым, Козьмодемьянск, Юрино кундемым вияҥдаш палемдат. Тӱвыра, печать да калык-влакын пашашт шотышто министерстве ялысе тӱвыра пӧрт, библиотеке, тоштер-влакым тӧрлаш да ышташ проект-смете документацийым ямдылышаш да яллаште пашам ыштыше специалист-влакым шукемдаш профориентаций дене пашам кумдаҥдышаш.
Комментариев: 0