«Чумбылат могучий» оперын премьерыже. Чыла шотыштат öрыктарыше произведенийым кызыт Эрик Сапаев лÿмеш опер да балет театрыште ямдылат. Немда эҥер серыште, 8 метр кÿкшытан да 27 метр лопкытан кÿ торашке коеш. Преданий почеш, лач тиде верыште марий калыкын онжо – Чумбылатым поген пыштыме. Илымыж годым тудо патыр, писе, чулым лийын, тыгодымак поро да мунло койышыж дене ойыртемалтын. Элина Архипован возымо «Чумбылат» опере тиде талешке нерген легендылан эҥерта: кушто шочын, кузе шке калыкшым тушман дечын арален да курык йымаке каен возын, но марий-влакым аралаш сöрен. Тиде преданийым семлан келыштарымеке, лÿмлö композиторна чапле оперым шочыктен. Тыште тул, йÿк, хореографий ден шомак-влак иктеш ушналтыныт
Элина Архипован у саскаже – марий музык тÿняште у йыжыҥ. Вет театрын репертуарыштыже национальный опер шукыжак огыл. Палемдаш уто огыл: тыште опер да балет театрын веле огыл, тыгак Яков Эшпай лÿмеш марий кугыжаныш филармонийын артистше-влакым ужаш лиеш – а тиде «Марий Эл» кугыжаныш куштышо ансамбль да Искандаров лÿмеш капеллын солистше-влакым. У пашан хореографше – Денис Фейзов, тудо зрительлан "Юнона и Авось", "Иисус Христос - суперзвезда" спектакль-влак дене палыме. Премьер 31 майыште лиеш.
Комментариев: 0