Регион вуйлатыше Александр Евстифеев правительстве еҥ, муниципал образований вуйлатыше-влак дене пырля «Образований» национальный проектым илышышке пуртымо нерген совещанийыште каҥашен. Туныктыш да шанче министр Наталья Адамова ешарен: республикыште регионысо 5 проект илышышке пура. 2017 ий гыч 5 школым чоҥымо, кызыт Медведево поселкышто 825 верлан у школым нӧлтат, тачысе кечын тудо 53 процентлан ямде, шыжым оборудованийым налаш аукцион-влакым увертарат. Яллаштат школ-влакым ыштат, кызыт Марий Турек районысо Сардаял ялыште 60 верлан школым ыштат, тидлан 82 миллион теҥге федерал субсидий ойыралтын. Министр ешарен: 2020 ийыште цифровой да гуманитарный профиль дене «Точка роста» лӱман 15 рӱдерым почыныт, тений сентябрьыште 21 у рӱдерым почшаш улыт. Килемар районысо Юксар селаште пищеблок дене пришкольный интернатым ыштат, Оршанка районысо Кугунур школышто пищеблокым ышташ экспертизе паша мучашлалтеш. Йошкар-Олаште школ-влакым ышташ яра мландым ойырат. Совещанийыште йоча-влаклан ешартыш шинчымаш, физкультур да спорт дене кылым кучымо, тыгак тунемме вер-влакын материально-технический базыштым уэмдыме нерген ойленыт.
Комментариев: 0