Эртыше кечылаште Юрий Зайцев Морко районысо социал объектлашке миен коштын. Ик эн ончыч тудо Коркатово лицейышке пурен. Тушто тунемше-влаклан малыме корпусым ыштыме йодыш шукертак пӱсын шога. 2014 ийыште лицей воктене интернатым чоҥаш тӱҥалыныт, но пашам мучашлен огытыл. У интернат вес ялла гыч толшо ӱдыр ден рвезе-влаклан илашышт да тунемашышт утларак сай йӧным пуышаш. Кызыт школышто 400 утла еҥ шинчымашым пога. Юрий Зайцев тунемме, компьютер класс-влакым аклен, лицейыште шукталтше патриот пашам ончалын. Регион вуйлатыше интернатым чоҥен шукташлан проект-смете документацийым ямдылаш кӱштен.
Комментариев: 0