Шушаш рушарнян ик эн вучымо пайремым – У ийым вашлийына. Молгунамсе семынак тудо Рошто пӱтӧ дене келшен толеш. У ий – светский манме пайрем гынат, черке тудым палемдаш чаракым огеш ыште. Пӱтым кучышо-влаклан тудым ласкан, опкынлык да кочывӱд деч посна эртарыман. Воскресенский соборын кочмыверыштыже 12 ий наре тыршыше Мария Прозорова палемда, «пӱтӧ» мут деч лӱдман огыл. Тыглай йӧрвар гычат ятыр тамле кочкышым ямдылаш лиеш. Мутлан, кавун гыч шӱрымат, пучымышымат, шере когыльымат, тамле йӱышымат ыштат. Рошто вашеш пӱтӧ жапыште шылым, муным, шӧрым, шöр кочкышым огыт коч. Но православий йӱлам кучышо-влаклан каныш кечылаште колым, мӧртньым да нӧшмӱйым лиеш.
Комментариев: 0