Марий тӱвыра рӱдер «Марий ёлкылан» ямдылалтеш

Марий йоча-влаклан – марий ёлко. Марий тӱвыра рӱдер икшыве-влакым  куандараш ямдылалтеш. Тений «У ий йомак» лӱман пайрем йоча-влакым 17 декабрьыште Республикысе Курчак театрыште пога. Туштак У ий вашеш увертарыме конкурсым иктешлат. Пайремыш кажне район гыч сай шинчымашым ончыктышо чолга ӱдыр-рвезе-влакым чумырат. Тидлан кажне районышко квотым колтеныт. Марий ёлко 11 шагатлан тӱҥалеш. Пайрем программе Йӱштӧ Кугыза да Лумӱдыр, йомак герой-влак дене пырля эрта. Сеҥымашын 80 ияш лӱмгече идалыкым шотыш налын, изи уна-влакым Марий Патыр-влак куандараш тӱҥалыт. Марий ёлкыш тиде гана 200 наре икшывым вучат.