1 июнь гыч делегат-влакым сайлаш тӱҥалыт. Тений октябрь тылзыште Йошкар-Олашке Российысе регионлаште илыше марий-влак 12-шо Марий калык Погыныш чумыргат. Погынлан ямдылалтме чыла йодыш кокла гыч ик эн тÿҥжö - делегатым сайлыме шотышто паша. Каласыман, делегатым сайлыме нерген йодмашым ик тылзе ончыч пуыман. 12-шо Погынышто мыняр делегат лиеш да нуным кузе сайлыман - Вера Горохова рашемден.
Кундемыштына талешке-влакын тистыштым нӧлталыныт. «Лесная сказка» йоча каныме верыште «Страна героев» лӱман сарзе да историй лагерь пашам ышташ тӱҥалын. Икымше смене 7-ше июнь марте шуйна. Кызыт тушто 400 наре икшыве шуаралтеш. Ӱдыр-рвезе-влак шке шинчымашыштым «Защитники», «Хранители истории», «Волонтёры Победы» ден «Медиа Победы» виктышлаште кумдаҥдат. Патриот-влакын кажне кечышт моткоч тӱвыргӧ. Нуно эреак тунемыт, кап-кылыштым лывыртат, уш-акылыштым пудыратат.
2-шо ужаш.
Йошкар-Олаште «Майатул» финн-угор театр-влакын 15-ше тӱнямбал фестивальышт эрта. Тудым М. Шкетан лӱмеш марий кугыжаныш драме театр «Гамлет. Машина. Цемент» спектакльже дене почын. Фестиваль жапыште чылаже 11 спектакльым ончыктат.
Республикысе школлаште пытартыш йыҥгыр-влак йоҥгеныт 9-ше да 11-ше класслаште тунемше-влак школ пагыт дене чеверласат. Морко район Шордӱр тӱҥ школын выпускникше-влаклан тиде кечын шуко поро тыланымаш мут йоҥген. Тунемше-влакым ача-ава, икымше туныктышо, уна-влак, икымше классыште тунемше-влак саламленыт. А выпускник-влак туныктыштлан поро шомакым, таумутым каласеныт, муро да куштымаш дене толшо-влакын чоныштым тарватеныт.
Этно, рок да ВИА группо-влакын мастарлыкыштым регион кӱкшытыштӧ акленыт. Курыкмарий районышто «Этносем» фестиваль эртен. Тудо Марий Элысе усталык пашаеҥ-влакын ушемыштын проектше почеш икымше гана лийын. Тушко 17 коллектив ушнен. Фестиваль нерген кумданрак Вера Горохован сюжетыштыже.
Марий Элысе туныктыш да шанче министрын алмаштышыже Валентина Гаврилова.
Республикыште у школ-влак чоҥалтыт. Килемар районысо Кугу Памъялыште у зданийым нӧлтеныт. Школ шке омсажым тений 1 сентябрь гыч почшаш. Тудым концессий ойпидыш почеш ыштат. Чоҥымаште у туныктымо стандартлан эҥертат.
Шернур районын тӱвыра да каныме рӱдерыштыже сӱретче Михаил Александровын «Ласточка в лицах» лӱман ончерже почылтын. Ончерыште «Ласточка» мурышо да куштышо образцовый ансамбльын участникше-влакын портретыштым ончыктен. Кумданрак Дмитрий Веденькинын сюжетыштыже.
Тений кеҥеж гыч турист-влаклан «Великий Волжский путь» у маршрут темлалтеш. Регион-влак кокласе тур Юл кундемын кум регионжым авалтен. Тушко Озаҥ, Йошкар-Ола, Чебоксар да Свияжск остров-град пуреныт. «Великий Волжский путь» маршрутым туриндустрийын экспертше-влак 2015 ий гычак шымлат. Кодшо ийын регион-влак кокласе турист маршрутлан национальный статусым пуэныт. Шукерте огыл Татарстан, Чуваший да Марий кундемын туроператоржо-влак у маршрутым шымлыме амал дене Йошкар-Олаште погыненыт.
