«Марий теле» фестиваль умбакыже шуйна. Проект Марий Эл Вуйлатышын темлымыж почеш шочын. Тудын кышкарыште ончер, спектакль, модмаш, тӱрлӧ тематике дене кылдалтше программе-влак эртаралтыт. Эртыше каныш кечылаште «Весела сем» фольклор ансамбль Патриарший площадьыш толшо-влакым сылне сем да куштымаш дене куандарен.

Специальный военный операцийын участникше-влакын авашт да пелашышт ВДНХ-асе «Россий» ончерыш миен коштыныт. Ачамландым аралыше сарзе еш комитет штабын еҥже-влакым Москош Россий Президент пелен Марий Эл Республикын постоянный представительже Ольга Бадма-Халгаева ӱжын.

Гармонь – тошто семӱзгар. Тудын лукмо семже моткоч сӧрал. Ты семӱзгарым шоктышо да йӧратыше-влаклан Республикысе калык усталык рӱдер «Пой, гармонь – душа России» калык талант фестивальым эртара. Фестиваль баяным, гармоньым да мурым йӧратыше еҥ-влакым иквереш чумыра.

Шонымашым шыҥдараш келшыше вер. Марий Эл Республик Вуйлатышын грантше районлаште самырык-влаклан шкешотан рӱдерым почаш йӧным ышта. Тений 2 проект сеҥен. Тыге Оршанке да Советский поселкылаште самырык-влаклан посна пöлем шке омсажым почын. Иктыштыже мемнан съемочный группына лийын.

Йошкар-Олаште икымше гана телымсе иймаш дене Россий кӱкшытан таҥасымаш эртен. Тушко тÿрлö регион гыч спортын тиде видшылан кумылан-влак чумыргеныт. Таҥасымашыш чылаже 70 утла спортсмен толын. Кумданрак – материалыште.

Марий паркыште марий унагудо, уремысе кинотеатр да калыкле кухньо кафе лийшаш. Йошкар-Олаште у объектым тӱзатыме шотышто йодыш-влак умбакыже рашемдалтыт. Ушештарем, ты каныме вер «Оласе йӧнан среда» федерал проект почеш ышталтеш.

Тӱнямбалсе этно-сӱретче-влакын пашаштым ужаш лиеш. Йошкар-Оласе калык-влакын келшымаш пӧртыштышт «Колесо Дружбы» лӱман ончер почылтын. Этнике сынан радына-влакым тӱрлӧ элла гыч 100 утла сӱретче ямдылен. Коллекцийым Марий Элыш Елабугысо кугыжаныш тоштер-заповедник конден.

Тиде арняште кундемыштына шинчымаш да наукылан пöлеклалтше мероприятий-влак эртат. 7 февральыште кугыжаныш да шочмо марий йылме, литератур да ИКН предметла дене регион-влак кокласе олимпиаде лиеш. Тушко республик кӱкшытыштӧ ойыртемалтше, сеҥыше радамыш лекше ӱдыр ден рвезе-влак ушнат.

«Марий Эл ТВ»: Интервью с директором МарНИИЯЛИ Людмилой Григорьевой. «Актуальное интервью» с Лирой Матвеевой.

Москосо ВДНХ-те «Россия» лӱман тӱнямбал ончер-форумышко 3 тылзе жапыште 6 миллион еҥ миен. Эртыше каныш кечылаште Йошкар-Олан арняжым туризм кече алмаштен. Уна-влакым Марий Элын сылне верлаже, турист объектше дене палдареныт. «Царёв город» фольклор ушем руш тӱвыра дене палдарыше калык модыш дене модыктен. Туризм кече кугу концерт дене мучашлалтын.