Дайджест новостей «Марий Эл ТВ» от 27 июля 2020г.
27 июль, эрлан, «Стопкоронавирус.рф» сайтын увертарымыж почеш Марий Элыште эше 22 еҥын коронавирус инфекций пенгыдемдалтын. Тыге, пандемий жаплан республик мучко чылаге 3697 ен covid-19 дене черланен. Нунын кокла гыч 3101 еҥ тӧрланен да 31 еҥ илышыж дене чеверласен.
«Олан чияже» лӱман проектын участникышт эше ик граффитим сӱретленыт. Тиде гана профессионал сӱретче-влак Эшкинин уремын 6А пӧртын пырдыжыштыже марий ӱдырым, «12 апостол» башньым, тыгак олан символжым – шордым сӱретленыт.
20 ий жапыште СОБРын сотрудникше да ветеранже-влак шке коллегыштым, милицийын капитанже Дмитрий Логиновым шарналтен спорт таҥасымашым эртарат. Тиде гана ветеран-влак шке коклаштышт пейнтбол дене таҥасеныт. Команде-влак тирыш, мишеньыш лӱйкаленыт да мучашыжлан пейнтболым эртареныт. Тидын годым команда-влаклан шке еҥыштым йомдарыде тушманын базышкыже пурен, тистым руалтен кучаш кӱлын. 
Марий Элыште верланыше Пугачевын тумыжо "Российысе пушеҥге - 2020" конкурсышто ончыл верыш лектын кертеш. Пугачев пушеҥгын кужытшо - 31 м. Тудо "Марий Чодра" национал паркыште верланен.
Республикысе книгагудо-влак уэш шке омсаштым почыт. Тыгодым икмыняр условийым шотыш налаш кӱлеш: книгагудышто 4 квадрат метрлан 1 еҥ гына лийын кертеш. Тушто пашам ыштыше да мийыше-влак коклаште 1,5 метр дистанцийым эскерыман.
«Йоча тазалыкым вияҥдымаш да у инфрастуктур йӧным кучылтын медицин полышым пуымаш» регионысо проект кышкарыште, Морко да Медведево район-влакын рӱдӧ эмлымверын йоча пӧлкажым олмыктеныт. Тиде пашам шукташ 1 млн 300 тӱжем утла теҥгем ойыреныт.
Марий Элысе олимпий резерв училищыште шуаралтше спортсмен-влаклан у экипировкым налме. «Спорт – норма жизни» федерал проектын кышкарыштыже, кугыжаныш полыш семын, спорт организаций-влаклан субсидийым ойырат.
Йошкар-Олаште Россий юж десант войскалан 90 ий темме лӱмеш мероприятий-влак эрташ тӱҥалыт. Тудо икмыняр кече эрта: 30 июльышто 9 шагатлан Российын Геройжо М. Н. Евтюхин лӱмеш "Гром" сарзе йӧндартыш комплексын марш-бросокышт лиеш. Тудо аэроклубын базыштыже эрташ тӱҥалеш. Мийыше-шамыч тактике да юж-десант ямдылалтмаште шкем терген кертыт
6 августышто Марий Элыште сонарзе-влак коклаште ир янлыкым лӱйкалыме шотышто жеребьевкым эртарат. Коронавирус шарлымылан кӧра тӱшка мерприятий-влак огыт эртаралт, сандене тиде мероприятийымат сонарлыше-влак деч посна – онлайн йӧн дене ыштат.
