Валерий Чеботкинын выставкыже почылтын. Тений сӱретчылан 60 ий. Тудын пашаже-влакым Республикысе сӱретсымыктыш тоштерын кокымшо пачашыштыже ужаш лиеш.. Выставкыште 100 утла паша. Нуным автор тӱрло жанрыште возен. Эн шуко сӱрет живопись йӧн дене ышталтын. Книга да театр графикылан посна йыжыҥым ойырымо. Ончерыште ятыр портретым ужаш лиеш. 

Российысе фольклор пайрем чыла марийым уша. Шыжа тылзын 1-ше кечынже Йошкар-Олаште российысе фольклор пайрем лиеш. Тудо Марий автономийым ыштымылан 100 ий да Пеледыш пайремым эртараш тӱҥалмылан ик курым теммылан пӧлеклалтын. Лач тиде кечын Йошкар-Олаште Марий калык погын шке пашажым тӱҥалеш. Пайрем, пандемий шарлыме лӱдыкшӧ улмо амаллан кӧра, очно да заочно эртаралтеш. Онлайн йӧн дене «Кудо», «Шокталте гармонетым», «Эх, марий вате», «Мастар кид» конкурс-влак лийыт. Конкурсант-влакын видеоштым Марий тӱвыра рӱдерын «ВКонтакте» тӱшкаштыже  вераҥдат. Чарла Кремльыште  11 шагатлан пайремым торжественно почыт. Тудын деч вара «Эх, кушталтена мо вара…» йыр куштымаш лиеш. «Калык чон» пайрем концертыште Марий Элысе да регионласе фольклор коллектив-влак шке мастарлыкыштым ончыктат. 15 шагатлан «Марий Эл» кугыжаныш куштышо ансамбль тӱрлӧ кундемлаште илыше марий калыкын куштымашыштым ончыкта. Тылеч вара сценыште  марий эстрадын шӱдыржӧ-влакын концерт программышт эртаралтеш. Фольклор пайрем Марий кас дене мучашлалтеш.

Морко районышто титак деч посна репрессийышке логалше-влакым шарныме лӱмеш обелискым почыныт. Тудым Чӱкшӧ курык воктен верланыше Кугу Шоръял ялеш шындыме. Чӱкшӧ курык – Марий Эл Республикын эн кӱкшака верже, сандене обелиск лач тиде ялеш верланаш келша манын, пунчалым ыштеныт. 

Кычалше отряд-влак Ржев ола воктене эртарыме экспедиций годым сар жапыште колышо салтак-влакын кап-кыл ужашыштым муыныт. Нуным пужен тойымашке Марий Эл гычат делегаций миен. Колышо салтак-влак коклаште мемнан землякна Михаил Гусеват лийын. Тудо Марий АССР тунамсе эше Пектубай район гыч фронтышко 42-шо ий июньышто каен. Тидын марте увер дечын посна йомшылан шотлалтын. Кычалше-влак салтакын родо-тукымжымат муыныт. Нунылан колышо кап пелен мумо икмыняр арверым пуэныт. Нине арвер-влак ончыкыжым Какшанмучаш школын тоштержым пойдарат.

Йошкар-Олаште нылле наре «наливайкым» петырат. Шочмын республикыште у закон вийым налын. Тудын дене келшышын, общепит заведенийлаште аракам ужалыме шотышто ешартыш чарак-влак улыт. Законышко шке кидпалыжым Марий Эл вуйлатыше Александр   Евстифеев пыштен. 

Марий Элышке тений 8 тылзе жапыште 10 тӱжемат 973 еҥ толын, а 11 тӱжем утла каен. Тидын нерген Маристат палдара. Вес элла гыч 840 еҥ мемнан регионышко толын гын, ик тӱжем утларак каен. 2020 ий январь-август тылзылаште республикыште илыше-влакын чотышт миграций могырым 59 еҥлан шагалемын. 

Ӱдырамаш-шамыч таҥасеныт. Россий ДОСАФ-ын Йошкар-Оласе технический рӱдержын автодромыштыжо «Автоледи Марий Эл -2020» таҥасымаш эртен. Тушко транспорт средствым виктарыме шотышто удостоверениян ӱдыр да ӱдырамаш-влак ушненыт. Нуно теорий палымым тергеныт. Тидыже корнышто коштмо правил дене кылдалтын. Конкурсышко ушнышо-влак скоростной маневрированийым эртеныт. 

Колонийыште противочумный костюмым ургат. 3-шо номеран исправительный колонийын ургымо цехше у изделийым - противочумный манме костюмым ургаш тӱҥалын. Таче кечылан жаплан эрык деч посна кодшо еҥ-влак 5 тӱжем утла комплект тиде вургемым   ургеныт, кызыт учреждений вес партийлан ойыпидышым ышта. Ончыкыжым колнийын ургышо цехыштыже йолчиемлан сумкам ургаш шонат. Тидлан тыште  кӱлеш оборудований ситышын уло. Цехлаште тиде пашам шукташ ургымо машина, оверлок, полдышым ыштыше машина, кройкым ышташ вашкӱзӧ, парогенератор дене шымартыме оҥа-влак улыт.

Республикыште КОВИД-19 вирус дечын вакцинын икымше партийжым конденыт. Тидын нерген тазалык аралымаш министерстве увертара. Кызыт коронавирус дечын привикым ышташ ямдылалтыт. Вакциным 18 гыч 60 ияш марте еҥ-влаклан шындат. Привикым эн ончыч медик, педагог, социал пашаеҥ-влаклан ышташ палемдат. Ешарыман, республикыште грипп дечын вакцинироватлат.