Российыште еҥ-влаклан коронавирус дечын вакцинацийым вес ий гыч тӱҥалаш шонат. Вице-премьер Татьяна Голикован мутшо дене, вакцинацийым кажне кумылын ыштен кертеш. Ушештарена, кызыт медицин пашаеҥ да педагог-влаклан веле Ковид дечын прививкым ыштат. Таче кечын Российыште коронавиурс дечын кок вакцине регистрацийым эртен: «Спутник пять», тыгак «ЭпиВакКорона».
Марий Эл гыч Кудрявцевмыт еш «Идалыкын ешыже» российысе конкурсышто сеҥен. Марий Эл гыч Кудрявцевмыт еш «Идалыкын ешыже» российысе конкурсышто сеҥен. Нунылан ноутбукым пӧлекленыт. Тений Марий Эл гыч российысе конкурсышто кок еш ойыртемалтын. Эпидемиологийческий ситуацийлан кӧра, сеҥыше-влакым тиде ийын Москвасе Кремль Дворецышке чумырен огытыл. Пӧлекым регионлашке колтеныт.
Йошкар-Олаште донор-влакын марафонжо эртен. Ик ВУЗын студентше-влак шым ий ончыч «Не бойся спасти чью-то жизнь» акцийым эртараш тӱҥалыныт. Тидын дечын вара марафон йӱлашке пурен. Тиде жапыште 4000 утла студент да туныктышо тиде акцийышке ушнен. Донор-влак коклаште икымше гана толшо-влакат, тыгак вӱрым пуаш ятыр гана ушнышо-влак улыт. Тений тиде акцийышке республикыште илыше 50 наре еҥ толын. Кажныже республикысе вӱрпуымаш станцийышке ала-кӧн илышым арален кодаш, полшаш шонымаш дене вашкен. Ешарена, Марий Элыште 3300 утла еҥ «Российын Почетан доноржо» лӱм дене палемдалтын.
Тиде кечылаште Йошкар-Олаште руш театр-влакын фестивальышт эрта. «Мост дружбы» - йӱлашке пурен. Тудым Константинов лӱмеш академический руш драме театр эртара. 29 ноябрь марте шуйнышо фестивальыште 12 спектакльым ончыктат. Ты гана постановко-влакым онлайн йӧн денат, театр сценыштат ончыктат. Башкортостан, Карелий, Удмуртий гыч театр-влак шке пашаштым онайн-йӧн дене темлат.
Ончыкылык пушеҥгылан росотам кушташ тений 1 тонн утла пӱнчӧ да кож нӧшмым ямдыленыт. Тиде паша «Экологий» нацпроект дене келшешын, «Чодырам аралымаш» федерал проект дене шукталтеш. Таче кечын республикыште чодырам уэмден шындаш оборудованийым налыныт, тыгак Марий Турек районышто 58 гектар кумдыкышто пушеҥгым шынденыт. Марий Турек, Шернур, Волжский да Куяр чодыра озанлыклаште 577 гектарыште тошто пушенге-влакым кораҥденыт, чодырам эрыктеныт. Чылаже тений республикыште 3411 гектарыште пушеҥгым шынденыт.
МЧС пашаеҥ-влак коҥга-влакым тергат. Специалист-влак Семеновка селаште профилактике рейдым эртареныт. Еҥ-влаклан коҥгам олтымо годым правил шуктымым умылтареныт. Йӱштӧ толмо дене калык коҥгам олта, тыгак лӱдыкшыдымылык правил шукталтмым огеш эскере. Идалык тӱҥалтыш гыч коҥга амаллан кӧра, 77 пожар лийын.
Мемнан коллегына-влакын черетан сеҥымашышт. Марий Элын 100 ийже лӱмеш Кугыжаныш Погын, депутат-влакын ыштыме пашаштым ончыктмо дене журналист-влак коклаште усталык конкурс эртен. Тушко республикысе газет, радио да телевиденийыште пашам ыштыше-влак ушненыт. Сеҥыше-влак радамыште журналист Наталья Ямаева.
Йошкар-Олаште вес ийын эше ик кумдыкым тӱзатат. Оласе администраций электрон аукционым увертарен. Тудын дене келшышын, Прохоров уремыште Зеленый гыч Ян Крастынь урем марте йолешке-влакын коштмо верыштым шотышко кондышаш улыт. План дене тушто тротуар-влакым тӧрлат, теҥгыл, урно-влакым вераҥдат, тыгак у понар-влакым шогалтышыш улыт, «4 номеран поликлинике» да «Западный» остановкылам волгалтарат.
Регионысо ава капиталлан тений 10 миллион теҥге ойыралтын. Январь гыч октябрь тылзе марте республикыште 172 еш регион кӱкшытыштӧ ойырымо ава капиталым налын. Октябрь тылзыште тудым 31 ешлан пуэныт. Ава капиталым республикыште нылымше але тудын дечын вара йочам ыштыше, але ашнаш налше-влаклан 2012 ий гыч палемдат. Кызыт тудлан окса «Демографий» нацпроект дене келшышын ойыралтеш. 2019 ийыште тудын кугышто 58 тӱжем теҥге чоло лийын гын, 2020 ийыште 60 тӱжемат 131 теҥге марте кугемын.
Регион вуйлатыше Москваште Российын чоҥымаш министрже Ирек Файзуллин дене вашлийын. Тудо - Республикым вияндыме шотышто индивидуальный программым шуктымо дене регионын кураторжо. «Экологий» нацпроект дене келшышын республикыште «Юл эҥерым тазаҥдымаш» федерал проект график почеш шукталтеш.
