Аван кечыж вашеш «Авамлан серыш». Марий тӱвыра рӱдер ден «Саскавий» ӱдырамаш ушем «Авамлан серыш» конкурсым увертареныт. Тений тудо кокымшо гана лиеш. Но пандемийлан кӧра форматше вашталтын. Чумыр проект «Авам дене пырля» маналтеш. Лачак тыгай лӱман конкурс 2018 ийыште лийын. Тунам мероприятийыш 6 еш ушнен. Нуно сӱретленыт, кочкышым ямдыленыт, мурымо да куштымо усталыкыштым ончыктеныт. А тений организатор-влак ава нерген сочиненийым возаш темлат.
Сеҥымашын 75-ше идалыкше лӱмеш эртарыме сылнымут конкурсым иктешленыт. Тудым тӱвыра, печать да калык-влакын пашашт шотышто министерстве эртарен. Конкурсышко 28 йодмаш пурен. Сылнымут да публицистика паша-влакым икмыняр номинаций дене акленыт.
Морко районышто ГТО нормативым сдатлаш тестирований рӱдерым почыныт. Тудым районысо физический культур да спорт рӱдер пелен ыштеныт. Тыге тазалыкым шуараш да ГТО нормативым сдатлаш эше ик районышто йӧн уло. Рӱдерым «Спорт- илышын нормыжо» проект дене ыштеныт. Ушештарен кодаш гын, Марий Элыште таче кечын ГТО нормативым 12 вере сдатлаш лиеш.
Йошкар-Оласе аэропорт идалык тӱҥалтыш гыч 11 тӱжем утла пассажирым кондыштарен. «Авиация в Марий Эл» пабликыште увертарат, кодшо ий тыгаяк жап дене таҥастарымаште, еҥ-влак самолет транспортым 3 пачаш шукырак ойыреныт. Эн шуко пассажир январьыште лийын -1800 наре, эн шагал – апрель тылзыште.
Чодыра пожарым йӧрташ тений 11 единице техникым налме, тыгак пожар ваштареш кучедалаш 94 тӱрлӧ оборудованийым. Специализированный техникым «Экологий» нацпроект дене келшышын «Чодырам аралымаш» регионысо проект кӱшеш налыт.
Семеновка селаште Гагарин да Молодежный уремлаште тротуар-влакым тӧрленыт. Тиде пашам «Оласе йӧнан средам ыштымаш» федерал проект дене шуктеныт.
Йошкар-Олан мэрже Семёновка селашке миен да ты кумдык-влакым ончен. Нине уремлаште илыше-влак эше 2018-ше ийыштак федерал программышке пураш йодмаш дене лектыныт.
Корнылаште туткар-влакын чотышт шагалемеш. «Рейтинг» увер агенствын данныйже дене, январь-сентябрь тылзылаште республикыште корно тутктар-влак, кодшо ий тыгаяк жап дене таҥастарымаште, 21% шагалемыныт.
Петров уремым да Шернур трактым вес ийын у корно уша. Йошкар-Олаште Петров уремым кугемдат. Воин-Интернационалист гыч Шернур тракт марте у корно лиеш. Тиде пашам вес ийын мучашлышаш улыт. Регион вуйлатыше А.Евтифеевын кӱштымашыже дене, тудым Марий Элын социал-экономике вияҥмаш программышке пуртеныт, тидлан 330 миллион теҥгем ойыреныт.
