Марий Элыште 2021 ийыште ЖКХ тариф-влак инфляций дечын чот огыт кугем. Тыгодым тариф-влакым 1 июльышто веле кугемдат. Январь тылзе гыч коммунал суаплыклан тӱлымӧ шотышто вашталтыш огеш лий. Июль тылзе гыч электроэнергий шергештеш, олаште илыше-влаклан - 3 теҥгеат 89 ыр гыч 4 теҥгеат 2 ыр марте кугемеш. Яллаште идалыкын кокымшо пелыштыже ик киловаттше 2 теҥгеат 81 ыр лиеш.
Инфекционный стационарлаште коронавиурс але тудын лийын кертме лӱдыкшӧ дечын 918 пациент эмлалтеш, 360 еҥын коронавирус инфекций пеҥгыдемдалтын. 140 пациент чот нелын черле, 400 еҥ кислород полшымо дене шӱла. Оперативный штаб увертара, республикыште 11 январьлан 9738 еҥын коронавирус пеҥгыдемдалтын, 8477 еҥ эмлалтын.
Каныш кечылаште республикыште 500 наре еҥын коронавирус инфекций пеҥгыдемдалтын, 10 кече жапыште тиде черлан кӧра 10 еҥ колен. Тыге республикыште чылаже тиде вируслан кӧра 132 еҥ ӱмыр лугыч лийын. Пытартыш суткаште республикыште 50 еҥын тиде вирус пеҥгыдемдалтын.
Лелия Соколова лӱмеш Йошкар-Оласе йоча больницыште у сервисым илышышке пуртеныт. Пациент-влак QR-код-влакым сканироватлен, медперсоналым писын ӱжын кертыт. Ик эн ончыч тиде сервис онкогематологий отделенийыште пашам ышташ тӱҥалын. Ача але ава медперсоланым ӱжаш шона гын, палатыште улшо кодым сото телефонышко сканироватла, сигнал медпашаеҥын телефонышкыжо вигак толеш. Эмлымверыште пытартыш жапыште шуко у технолгийым илышышке пуртат. Ончыкыжым тыгай сервис йоча больницын моло отделенийлаштыжат лиеш.
У Ий каныш кечылаште республикыште 21 пожар лийын. Россий МЧС-н республикысе виктемже увертара, 7 оралте йӱлен, ик еҥ тулеш ӱмыр лугыч лийын. Тулазап-влакын тӱҥ амалышт- электровоштырын начар улмыжо да коҥгам олтымо годым правилым пудыртымаш. Эн шуко пожар Медведево районышто лийын, тушко пожарым йӧртышӧ-влак 6 гана лектыныт, 3 тулазап дене Йошкар-Ола ден Волжскышто, 2 пожар дене Курыкмарий, Марий Турек, У Торъял районлаште, икте дене Морко, Звенигово да Шернурышто лийыныт.
