Республикыште илыше-влак триколорым шке кид дене ыштен, Российысе акцийышке ушнен кертыт. Сеҥымаш тоштер «Россий тистын тӱсшӧ» онлайн-флешмобым увертарен. Акций россий тисте кечын 22 авгусышто эрта. Тиде кечын Сеҥымаш тоштерыште тӱрло кундемла гыч колтымо фото-влакым ужаш лиеш. Патриот онлайн-мозаикым чумырымашке чыла кумылан еҥ ушнен кертеш. Тидлан россий тистым тоштерын сайтыштыже вераҥдыман. Организатор-влак усталык шӱлышым пашашке пурташ йодыт: триколорым сӱретлаш, коллажым ышташ, ургаш, але тортым кӱэшташ лиеш. Икымше гана тыгай акций кодшо ийын эртен. Тудын  нерген тичмаш увер-Сеҥымаш тоштерын сайтыштыже. 

Марий Эл гыч студент-кычалше-влак Кавказышке экспедий дене   каеныт. 22 июль гыч 9 август марте Кабардино-Балкария республикыште «Заоблачный фронт» сарзе-историй фестиваль эрта. Тушко кычалше да реконструктор-влакын отрядышт ушненыт. Марий Эл гыч «Воскресение» отряд каен. Шуматкечын боец-влак Маруханский перевалышке салтак-влакын капужашыштым кычалаш лектыныт. Тушто Кавказым аралыме годым 1942 ийыште август мучаш гыч сентябрь тӱҥалтыш марте тале кредалмаш лийын. 

Республикыштына нылымше номеран колонийыште медицина пашаеҥ-влаклан спецвургемым ургаш тӱҥалыт. Эртыше кечылаште  марий УФСИН-ым вуйлатышын алмаштышыже Николай Шабалин туберкулёз ваштареш кучедалше диспансерын вуйлатышыже  дене вашлиймашым эртарен. Тушто медицина пашаеҥ-влаклан нылымше колонийыште ыштен лукмо спецвургем комплект-влакым ончыктен. Мутлан, тений икымше пелийыште исправительный тӧнеж-влак тыгай заказчик-шамычлан ик миллион наре теҥгеаш полышым пуэныт. Производственник-влак костюмын образецшым ямдылат да вара ойпидышым пеҥгыдемдат.

Сайлымаш участкыште Марий Элыште ик тӱжем утла камере-влакым вераҥдат. Тидын нерген рӱдӧ оласе мэрий палдара. Кугыжаныш Думышко йӱклымашын онлайн-трансляцийже 264 участке гыч каяш тӱҥалеш, моло 275 верыште оффлайн-видеофиксаций лиеш. «Марий Эл» ий полатыште вияш трансляцийым ончыктышо куд экраным вераҥдат.  Ушештарена, сентябрьыште Кугыжаныш Думын у составшым сайлаш тӱҥалына, чылаже 450 еҥым ойыраш кӱлеш. Ӱлыл палатын пелыже – тиде партий списке дене ойырымо депутат-влак, пелыже – ик мандатан округ дене. 

Эшкинин уремыште икмыняр национальный проект дене пашам шуктат. Асфальтын реконструкцийже дене пырля, тыште йӱр вӱд йогымо канализацийым, тротуар-влакым шотышко конденыт. Пашам августышто мучашлышаш улыт ыле, но июль мучаште ыштен шукташ палемдат. 

Республикыште посна категорий граждан-влак иммунизацийым чылан эртышаш улыт. Коронавирус дене черланыше-влакын шукеммыштлан кӧра, регионын тӱҥ санитар врачше Светлана Булатова постановленийышке кидпалыжым пыштен.

Йошкар-Олаште 2 август гыч школ-влакын у тунемме ийлан ямде улмыштым тергаш тӱҥалыт. Кызыт класс-влакым мебель дене пойдарат, ачалат, пищеблоклашке у оборудованийым вераҥдат. Йошкар-Оласе вич школышто леведышым ачаленыт, иктыште пищеблокым, кок школышто кумдык воктене асфальтым вашталтеныт. Рӱдӧ оласе шым школышко у оборудованийым налыт. Муниципал программе дене келшышын, 6-шо номеран школлан – кӱмыж-совлам мушшо установкым, 4-ше гимназийлан протирочный машинам, 11 лицей ден 12-шо номеран школлан холодильный шкаф-влакым, 7 номеран школлан – мясорубкым. Посна тӱткыш коронавирус инфекцийым шижтарымылан ойыралтеш. Чыла тунемме вер-влаклан термометр, маске, перчатке, антисептик, дезинфицирующий средство-влакым налыныт. 

Александр Евстифеев газификаций йодышлан пӧлеклалтше совещанийым эртарен. Регион вуйлатыше палемден: Россий Президентын кӱштымашыжым шуктымо амал дене, пӧрт марте еҥ-влаклан газым оксам тӱлыде шупшаш тӱҥалыт. Марий Элыште клиент-влак дене пашам ыштыше рӱдер шке омсажым почын. Газификаций республикыште сайын кая. 

Регион вуйлатыше следствий органлаште тыршыше да ветеран-влакым профессионал пайрем дене саламлен. Тудо палемден: нунын пашашт дечын элыште илыше еҥ-влакын ласкалыкышт да тыныслыкышт палдырна. Следствий органалште пашам сайын палыше, кӱкшӧ квалификациян специалист-влак тыршат.    Марий Элыште тений икымше пелийыште преступлений шотышто 1300 утла тергымаш эртаралтын, 200 утла преступленийым рашемденыт, тышечын  коррупций шотышто 22 уголовный паша.

Тений июль тылзын икымше пелыштыже республикыште илыше-влак деч социал кыл йӧн полшымо дене 430 йодмаш да вуйшиймаш пурен.  Кундемым виктарыме рӱдерын специалистше-влак кодшо тылзе тыгаяк жап дене таҥастарымаште йодмаш-влак шукеммым палдарат. Транспорт, тазалыкаралтыш, социал вияҥмаш министерстве-влакын пашашт  шотышто утларак йодыш Йошкар-ола, Волжск, Козьмодемьянск гыч пурен. Теме нерген ойлаш гын, еҥ-влакым корно, кумдыкым тӱзатыме, социал аралтыш, образований йодыш-влак  тургыжландарат. Кундемым виктарыме рӱдер чыла йодышым вуйын шогышо ведомствышко рашемдаш колтен.