Волжск оласе йочасадлаште самырык ача-ава-влаклан полыш клубым чумырат. Икшывым йочасад гыч тӱҥалын школыш кайыме жап марте чын корныш шогалташ, психологически умылаш да ӱшаным сулаш куштылгыжак огыл. А тыгай клуб самырык ача-ава-влаклан полшен кертеш – палемда проектын авторжо, Волжск оласе 19 номеран йочасадын вуйлатышыже Елена Николаева. Ӱдырамаш тиде шонымашыжым илышыш пурташ Россий кӱкшытан конкурсышко ушнен да сеҥыше-влак радамыш логалын. Ача-ава-влаклан клуб «Таза еш – виян Россий» проект кышкарыште ышталтеш. Тушко психолог, воспитатель, физикультур дене инструктор да моло специалист-влак коштын кертыт. Кызытеш проектышке ныл йочасад ушнен. Ача-ава-влаклан занятий да консультацийым паша деч вара эртараш палемдыме. Тылеч посна тренинг, мастарлык-класс, конкурс да тӱшка мероприятий-влак лийыт.
Комментариев: 0