Республикын 100 ияш лӱмгечыжлан ший оксам луктыныт. Александр Евстифеев Марий Эл республикыште Россий Банк виктемын вуйлатышыже Николай Жуков дене вашлийын. Тушто Марий автономийын 100 ийжылан лӱмын лукмо ший оксам ончыктеныт. Ший оксан ик могырыштыжо – Россий Федерацийын кугыжаныш гербше. Вес могырыштыжо – марий вургем дене шӱвырым шоктышо пӧръеҥ да марла куштышо ӱдырамаш. Тушто тыгак «Марий Эл Республике» «100 ий» возымо. Российын банкше историйыште икымше гана марий кундемлан пӧлеклалтше оксам луктеш. Тудым Санкт-Петербург олаште ший гыч велыктыме. Нелытше -31,1 грамм. Ший оксан эскизшым Республикын Правительствыже да Россий банк ыштеныт. Шарнашлан ыштыме окса марий кундемын поян историйжым да марий калыкын ойыртемжым ончыкта.
Комментариев: 0