Йошкар-Олаште «Идалыкын студентше» Российысе калыкле премийын регионысо этапшым иктешленыт. Тений тушко колледж да техникумла гыч 50 студент ушнен. Финалышке, 9 номинаций дене, 34 еҥ лектын. Нуным Марий Элысе туныктыш да шанче министрын алмаштышыже Андрей Сушенцов саламлен.

Премийын регионысо этапыштыже Марий Элысе профессионал туныктыш организаций-валк коклаште Гран-прим Карина Хабибрахмановалан кучыктеныт. И.С.Палантай лӱмеш Тӱвыра да сымыктыш колледжын студенткыже «Идалыкын уста еҥже» номинацийыште сеҥен. 

Регионысо этапын лауреатышт да сеҥышышт Идалыкын студентше» премийын заочный этапыштыже шке вийыштым тергат.   Финал 26 гыч 30 ноябрь марте Киров олаште эрта. Тудо Ешын идалыкше да Вичын 650 ияш лӱмгечыжлан пӧлеклалтеш. Ушештарена, «Идалыкын студентшым» мемнан кундемыштына 2018 ий гыч палемдат.