Марий Элыште шордо-влакын ик вер гыч вес верыш куснымо жапышт тӱҥалыт.
Тидын нерген пӱртӱс поянлык департамент палдара. Ноябрьыште миграций чот шарла, тыгай годым шордо кугорныш лектын кертеш. Автомашинам виктарыше-влаклан корнышто кудалме годым эскераш темлат. Департамент янлык дене кылдалтше ДТП лийме вер нерген увертара. Тиде Йошкар-Ола – Зеленодольск кугорнын 50-53 километрыштыже, Вятка кугорнын 105-107, 110-113 километрже, Йошкар-Олам эртыме корнын 47 километр, Кокшайск-Красногорский корнышто 1-2, 5-7, 27-29 километрыште. Автомашина виктарыше-влаклан лӱдыкшӧ вер нерген палаш, департамент «Йоша» цифровой полышкалышым пашаш колтен. Тудым МАКС платформышто чат-бот семын муаш лиеш.