Марий Элын Вуйлатышыже Юрий Зайцев мӱшкыран студентке-шамычлан 100 тӱжем теҥге дене тӱлаш пунчалым луктын

Марий Элын Вуйлатышыже Юрий Зайцев мӱшкыран студентке-шамычлан 100 тӱжем теҥге дене тӱлаш пунчалым луктын.

У выплате самырык ава-влаклан полшаш виктаралтын. Тудо ‒ йоча шочмо чотым кугемдыме шотышто регионысо программын, тыгак Россий Федераций Президент Владимир Путинын тӱҥалтышыже почеш илышыш пурталтше «Еш» нацпроектын ужашыже.

Ик гана ойыралтше оксам профессиональный але кӱшыл шинчымашым очный формо дене налше студентке-шамычлан тӱлат. Выплатым академический отпускышто улшо-влакат налын кертыт. Палемдыме оксам налашлан студентке-влаклан ӱдырамаш консультацийын учётышкыжо мӱшкыран улмо 12 арня гыч 6 тылзе марте шогалшаш улыт. Ты марте тыгай выплатым азам ыштыме деч вара веле тӱленыт. Документым Кугыжаныш да муниципал услуго портал, республикысе чыла МФЦ гоч, илыме верысе Калыклан социал полыш рӱдерыште пуаш лиеш.