Сылнымутым йӧратымаш М. Горький лӱмеш литератур институтын Кӱшыл сылнымут курсышто тунемаш йӧным ыштен. Самырык поэт Виктория Матвеева тений кугу сылнымут конкурсым эртен. Виктория 2 книган авторжо. Икымше сборникше «Эше йӱла окнаште тул» маналтеш, кокымшыжо - «Нангае мыйым корно». 2023 ийыште самырык ӱдыр Светлана Эсаулова лӱмеш премийын лауреатше лийын. «Светлана» конкурсышто сеҥымыже кокымшо книгам савыкташ йӧным ыштен. 

Йӱдвел коштмашлан шӱмаҥше-влак чумыргат. Марий Элыште «Ходьба для всех» лӱман 10-шо фестиваль эрта. Тиде виктыш республикыштына 2014 ийыште вияҥаш тӱҥалын. Тӱҥалтышым «Йолгорно» йӱдвел коштмаш рӱдер пыштен. Фестиваль лач тидын дене кылдалтын. 

2024 ий - У Торъял районын сылнымут илышыштыже кугу кышам кодышо идалык. Ты кундемыште шочын-кушшо ныл палыме да пагалыме поэт-писательын шочмыштлан - 100 ий. Тиде Василий Сапаев, Борис Данилов, Вениамин Иванов, Вера Бояринова. Шукерте огыл Вера Бояринован шочмо кундемыштыже Онар лӱмеш Токтарсола школышто поэтессылан пӧлеклалтше пайрем эртен. 

Тӱвыра аланым саемдат. Республикыште тӱвыра тонеж-влакым ачалат. Шокшым пуымо тургымлан ямдылалтме кышкарыште газым пуртат, оборудованийым вашталтат. Ятыр клубышто косметический ремонтым ыштат, леведышым тӧрлат. Ачалыме пашалан оксам республикысе да муниципал бюджет гыч ойырат.   

Российысе калык-влакын национальный костюмышт дене палдарат. «Калык вургем пайрем унала ӱжеш» Российысе национальный костюм конкурс угыч рӱдолашке вашка. Кок ийлан ик гана эртаралтше вургем фестиваль 3 октябрьыште тӱҥалеш.       

«Шытенак лектыт мут-влак шӱм-чон гочын…» - тыге маналтын Марий Элысе сымыктышын сулло деятельже Альбертина Иванован лӱмгечыжлан пӧлеклалтше вашлиймаш. Тудо В. Колумб лӱмеш йоча да самырык-влаклан книгагудышто лийын. Вашлиймашым «Культура.рф» платформышто ончыктеныт. Кумданрак Эльвира Петрован сюжетыштыже. 

Марий гармонь ок йом. Советский районысо Кужмарий тӱвыра пӧрт Виктор Бурлаковым шарныме лӱмеш «Под однорядку» лӱман фестиваль-конкурсым эртарен. Тушто марий гармонь дене шоктен моштышо гармоньчо-влак шке мастарлыкыштым ончыктеныт. Икымше гармонь фестивальыш рӱдола да республикын 4 районжо гыч семмастар-влак ушненыт.                    
 

Марий калык модышым вияҥдат. Классический университетысе физический культур, спорт да туризм факультет «Национальные виды спорта» проектым илышыш шыҥдара. Тиде тӱшкашке пурышо спортын видше дене республикысе школлашке лектыт. Тиде гана марий калыкын модышыжо – сонар дене Йошкар-Оласе 32-шо номеран школышто модыныт. Йоча-влакым спортын у видше дене палымым ыштеныт. Тушто мемнан съемочный группына лийын. 

Кужеҥер районысо Йӱледӱр ял шотан илемлан – 100 ий. Пайрем мероприятий эртыше шуматкечын лийын. Тушко администраций пашаеҥ, ялозанлык вуйлатыше, уна да верысе калык погыненыт. Йӱледӱр ял шотан илем 15 ялым ушен шога. Верысе калык ондаксе семынак мланде пашамат шукта, школ, клуб да моло вереат тырша. Илалше-влакат пайремыш кумылын толыныт. 

Марий Эл гыч 7 журналист Сочи олаште эртаралтше «Вся Россия» медиафорумышто лийын. Форум 16 гыч 22 сентябрь марте эртен. Тушко журналист конкурслаште сеҥыше, тыгак газет, телевидений, радио да моло СМИ-н вуйлатышышт, блогер, мер пашаеҥ-влак миеныт. Участник-влак элнан чыла регионжо гыч толыныт. Ушештарем, форумышко мемнан коллегына-влак директор Ирина Фоминых да шеф-редактор Рамиля Салихова миеныт. Форумышто журналист-влакым тургыжландарыше йодышым каҥашеныт, СМИ-н пашаштыже нейросетьым кучылтмашым лончыленыт. Тыгак презентаций, мастарлык класс да вашлиймаш эртеныт.