Марий йӱла гоч салтак-влаклан аралтыш. Республикысе Марий Юмыйӱла ушем, марий онаеҥ-влак СВО-што улшо рвезе-влак верч кумалын, марий йӱла радам дене аралтышым йодыт. Ты паша Марий Элыште гына огыл, Пошкырт кундемыштат шукталтеш.
Теле толмеке еҥ-влак тӱрлӧ чер дене черланат. Тиде грипп, ОРВИ, ОРЗ. Ты амал денак южо школлаште йоча-влак вучыдымын каникулыш каят. Амалже – карантин. Теве, мутлан, Волжск туныктыш пӧлкан уверже почеш Юлсер кундемыште 5 школ карантиныште. Кузе шкем чер деч аралаш? Тудын деч могай лӱдыкшым вучаш? Вашмутым Кристина Быкова кычалын.
Морко район Изи Кушна ялын эргыже, тале ечызе, специальный сарзе операцийыште вуйжым пыштыше Михаил Михайловым шарныме лӱмеш Морко район Шордӱр тӱҥ школышто ече дене таҥасымаш эртен. Район кӱкшытан таҥасымашке Морко районын 10 школжо гыч участник-влак ушненыт. Чылаже 110 ечызе ечыгорныш шогалын. Эн ончыч стартыш Михайловмыт еш лектын. Нуно 1 километр кужытым куржыныт.
Марий йылмым электрон учебник почеш тунемаш да шочмо йылмым туныктышо-влакын мастарлыкшым вияҥдаш посна кластер. Тидын нерген туныктышо-влакын семинарыштышт ойленыт. Тиде туныктышо да педагогын идалыкше кышкарыште илышыш пурталтше эше ик вашталтыш. Кумданрак сюжетыште.
Салтак-влаклан полыш. Калык прикладной сымыктыш тоштер-пӧрт пелен чумыргышо «Тепло женской души» кидпашазе –влакын клубышт, С.Г. Чавайн лӱмеш книгагудысо «55+» проектын участникше-влак специальный сарзе операцийыште улшо мемнан салтакна-влаклан пижым пидыт. Ыштыме паша-влакым январьыште колташ палемденыт.
Ончыкылык профессийым ойыраш полшымо амал дене. Марий Элысе тӱрлӧ профессийлан ончылгоч ямдылыше рӱдер тунемше ден студент-влакым кундемнан тӱрлӧ производственный предприятийлашке экскурсий дене коштыкта. Ты паша шукерте огыл тӱҥалын гынат, 800 наре ӱдыр-рвезе тӱрлӧ предприятийын пашажым кӧргӧ гыч ужын аклен. Тиде проект кышкарыште 30 утла организаций дене ойпидышым ыштеныт. Нунын коклаште Искож завод. Тушко Руэм кыдалаш школын тунемшыже-влак миен коштыныт. Йоча-влак дене предприятийыште мемнан съемочный группына лийын.
Марий Элыште самырык педагог да воспитатель-влаклан ешартыш выплате лиеш. Тудым Кугыжаныш погынын депутатше-влак закон дене пеҥгыдемденыт. Регион вуйлатыше Юрий Зайцев образований сферыште пашам ыштыше самырык специалист-влаклан полшаш темлен. Закон проект верч депутат-влак Марий Эл Кугыжаныш Погынын черетан сессийыштыже йӱкленыт. Школ, йочасадышке толшо самырык педагог-влаклан республике ик гана окса полышым ойыраш тӱҥалеш. Тыгак депутат-влак йочам ешышке ашнаш налше еш-влаклан пособийым кугемдыме верч йӱкленыт.
Йӱштӧ Кугызан резиденцийже ынде Москоштат уло. Тудо «Россия» ончер-форумышто почылтын. Юзо коча Лумӱдыр уныкаж дене пырля Марий Элын стендыштыже уна-влакым 30-шо декабрь йотке вашлияш тӱҥалеш. Идалык мучаш марте юзо-влак оҥай программым темлат. Уна-влакым тӱрлӧ модмашке ушнаш ӱжыт. Палемдыман, элнан рӱдолашкыже Йӱштӧ Кугыза ече дене куржын толын. Пеленже ятыр пӧлекым, сувенирым да тамле йӧрварым конден. У ий шӱлышан программыш кугу кумыл дене йоча-влак веле огыл, кугыеҥат ушнат.
«Марий Эл ТВ»: Интервью с Анастасией Ивановой - научным сотрудником музея истории города Йошкар-Олы. «Актуальное интервью» с Лирой Матвеевой.
Лӱмлӧ тренерым чапландарен. Марий Эл Республик Российын 9 регионжо гыч чолга самырык спортсмен-влакым вашлийын. Бокс дене СССР-ын спорт мастерже Эрик Якаевын призше верч регион-влак кокласе турнир эртен. Тушко мемнан съемочный группынат миен.
